Ouvir RAFA Ritmo, Voz e Coração de Timor
Xefe Departamentu Notítia no Redasaun, Francisco Belo Simões da Costa reprezenta RAFA simu prémiu husi prezidente juri nu'udar mós membru Conselho Imprensa Benevides Correia Barros hanesan mídia ne'ebé di'ak liu iha tinan 2026 iha ámbitu selebrasaun loron nasionál liberdade imprensa ba dala-IV iha CCD, Sesta-kalan, 16 Outubru 2026.
Díli, 17 Outubru 2026 (RAFA)-Órgaun reguladór komunikasaun sosiál, Conselho de Imprensa de Timor-Leste (CI, sigla portugés) atribui prémiu as liu Conselho de Imprensa nian iha tinan 2026 ba mídia RAFA (ETO-TELCO) hanesan mídia ne’ebé di’ak liu iha tinan 2026.
RAFA hanesan meius komunikasaun sosiál husi órgaun komunikasaun sosisál ETO-TELCO nu’udár empreza subsidiáriu husi empreza grupu Esperança Timor Oan (ETO).

Prémiu órgaun komunikasaun di’ak liu tinan 2026 ne’ebé atribui ba RAFA (ETO-TELCO) ne’e iha ámbitu komemorasaun Loron Nasionál Liberdade Imprensa ba dala-IV ne’ebé hala’o iha Sentru Konvensaun Díli (CCD, sigla portugés), Sesta 16 Outubru 2026.
Tuir lista avaliasaun juri ba premiu Conselho de Imprensa nian tinan 2026, katak iha órgaun komunikasaun 12 mak tama iha selesaun. Mídia sira-ne’e mak hanesan Jornál Diáriu Timor Post, Jornál INDEPENDENTE, Grupu Média Nacional (GMN), Suara Timor-Lorosa’e korporativu (STL Corp), Jornál Dili Post, HATUTAN.Com, Diligente.Com, RAFA (ETO-TELCO), Lafaek News, Média Mudansa, Televizaun Edukasaun Timor ho SAP News.
“Entre média 12 ne’e, mellór órgaun komunikasaun sosiál ne’ebé garante jornalista sira nia bem estar di’ak liu atribui ba meius komunikasaun sosiál RAFA (ETO-TELCO),” anúnsiu ofisiál husi Conselho de Imprensa de Timor-Leste iha serimonia topu loron nasionál Liberdade imprensa ba dala-IV ne’ebé asiste direta husi Priemriu-Ministru (PM), Xanana Gusmão, Sekretáriu Estadu Komunikasaun Sosiál (SEKOMS), Expedito Dias Ximenes, antigu Prezidente Conselho de Imprensa no daudaun ne’e hanesan Provedór Direitu Umanu no Justisa, Virgílio da Silva Guterres ho kondivdadu onra sira husi komunidade mídia nasionál no internasionál.
RAFA harii husi Nilton Telmo Gusmão dos Santos ho Akita Tama Laka (saudozu) durante tempu susar hafoin referendu 1999.
RAFA mosu nu’udár símbolu esperansa no rekonstrusaun iha Timor-Leste. Ida-ne’e mak estasaun rádiu dahuluk ne’ebé mosu hafoin independénsia, halibur foin-sa’e sira, habelar haksolok, no fó lian ba jerasaun foun. Maski, barak sei hela iha uma ne’ebé halo ho ahu-riun hafoin destruisaun ne’ebé kauza husi violénsia ne’ebé mosu hafoin referendu 1999, iha ne’ebé Timoroan sira vota atu haketak husi Indonézia no harii nasaun ida ne’ebé independente no livre.
Iha selebrasaun loron nasionál liberdade imprensa, tinan ne’e, Conselho de Imprensa atribui mós prémiu Adelino Gomes, prémiu kategória mellor reportajen iha lian Portugés hodi atribui ba manan na’in jornalista Reli Santos Viana husi Mídia Online Diligente.
Prémiu seluk ho naran Francisco Borja da Costa, kategória reportajen asuntu sosiál di’ak liu iha jornál no online, atribui ba manan na’in-jornalista Lourdes do Rego ho nia notísia husi Mídia Diligente.
Prémiu Greg Shackleton, kategória reportajen ba asuntu sosiál di’ak liu iha rádiu no televizaun, atribui ba manan na’in jornalista Cidalia Fátima husi agénsia notisioza Tatoli no prémiu Bernadino Guterres, ho kategória foto jornalizmu di’ak liu ba asuntu sosiál, iha média online no jornál, atribui ba manan na’in jornalista Juvenal Cabral dos Santos husi média online HATUTAN.com.
Jornalista: Cristina Ximenes
Written by: RafaFM
Conselho Imprensa Atribui Prémiu Ba RAFA Nu’udar Mídia Di’ak Liu iha 2026
todayNovember 20, 2026 13 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt