CNJCTL Sei Organiza Eventu Importante Tolu Ba Hametin Fiar Foin-Sa’e Sira Nian

Ekipa CNJCTL hasoru malu ho Xefe Estadu José Ramos-Horta iha Palásiu Prezidensiál, Segunda 18 Maiu 2026.

Díli, 18 Maiu 2026 (RAFA.TL)- Prezidente Komisaun Nasionál Juventude Katólika Timor-Leste (CNJCTL, sigla portugés), Pe. Francisco Indra do Nacimento Tixeira, informa, tinan  ne’e, CNJCTL sei organiza eventu importante tolu ba hametin fiar foin-sa’e sira nian atu kontinua hodi misaun paz nian iha sosiedade no sai ajente Kristu nian ba maun-alin sira.

Prezidente CNJCTL, Pe. Francisco Indra do Ncimento Tixeira hatoo informasaun ne’e ba jornalista sira hafoin hasoru malu ho Prezidente Repúblika José Ramos-Horta iha Palásiu Prezidensiál, Segunda (18/05/2026).

Saserdote ne’e hatete objetivu Komisaun Juventu Katolika husi Dioseze Dili, Baucau no Dioseze Maliana, hasoru malu ho Prezidente Repúblika atu relata foin-sa’e Katólika sira nia ajenda tolu ne’ebé maka sei akontese iha tinan ida ne’e no mós iha tinan oin.

Nia  tenik iha programa importante tolu ne’ebé komisaun hato’o ba Prezidente Repúblika hanesan asembleia Fé tinan 2026, ne’ebé sei hahú husi loron 28-31 fulan-Maiu, tinan ne’e. Hafoin jornada nasionál juventude ninia ne’ebé sei realiza iha Parokia Remexio, hahú husi loron 17-21 fulan-Agostu, no relata ba Xefe estadu kona-bá jornada mundiál juventude ne’ebé sei hala’o iha Korea Súl hahú husi loron 03-08 fulan-Agostu tinan 2027.

Objetivu husi Asembleia Fé ne’e maka atu halo site visit mai iha Palásiu Prezidensiál no mós atu halo audensia ho formandu sira ne’ebé mai husi Dioseze tolu maka hanesan, Arke Dioseze Díli, Dioseze Maliana no mos Dioseze Baucau.

CNJCTL mós konvida Xefe Estadu atu marka prezensa iha jornada nasionál iha Parokia Remexio atu hamutuk ho foin-sa’e sira hodi hato’o mós mensajen importante iha eventu foin-sa’e sira nian ne’e.

Prezidente CNJCTL hateten, Xefe Estadu agradese ba komisaun Juventude Katólika ne’ebé partilla informasaun sira, no Xefe estadu mos prontu atu marka prejensa iha eventu Jornada nasionál ida ne’e, baninhira Prezidente livre husi servisu estadu nian.

Prezidente Juventude Katólika ne’e mós husu ba foin-sa’e sira atu mantein paz no estabilidade iha komemorasaun loron restaurasaun Independénsia ba dala XXIV ne’ebé sei selebra iha loron 20 Maiu.

“Joven ne’ebé di’ak nafatin iha konsiensia ne’ebé d’iak, hadomi ita nia aan no respeita mós ema seluk no lori nafatin unidade iha nasaun ida ne’e,” Nia hateten.

 Jornalista: Remigi Locatelli/Editór: Vito Salvadór