CET Presta Omenajen Ba Maktoban Saudozu Francisco Guterres Lú-Olo

Prezidente CET no Bispu Arquedioseze Metropolitana Díli, Dom Virgílio Cardeal do Carmo da Silva, SDB, Bispu Dioseze Baucau Dom Leandro Maria Alves ho Bispu Dioseze Maliana Dom Norberto do Amaral hamutuk ho nailulik no relijiozu sira presta omenajen ba Maktoban Saudozu Francisco Guterres Lú-Olo iha nia rezidénsia Farol, Díli, Tersa (23/06/2026).

Díli, 23 Juñu 2026 (RAFA.TL)- Konferénsia Episkopal Timorense (CET, sigla portugés), presta omenajen ba Maktoban Saudozu Francisco Guterres Lú-Olo iha  nia rezidénsia Farol hodi hatoo sentidu kondolénsia ba família, Governu, partidu FRETILIN, espesialmente ba povu Timor-Leste ne’ebé lakon lider nasionál ida ne’ebé kontribui ba Timor-leste durante luta ba libertasaun nasionál to’o independensia.

Igreja Katólika nia omenajen ne’e presta direita husi Prezidente CET no Bispu Arquedioseze Metropolitana Díli, Dom Virgílio Cardeal do Carmo da Silva, SDB, Bispu Dioseze Baucau Dom Leandro Maria Alves ho Bispu Dioseze Maliana Dom Norberto do Amaral hamutuk ho nailulik no relijiozu sira,  Tersa (23/06/2026).

Dom Virgílio Cardeak do Carmo da Silva, SDB, ba jornalista sira hateten Saudozu  Francisco Guterres Lú-Olo kontribui barak ba luta libertasaun nasionál no prosesu konstrusaun Estadu Timor-Leste. Lú-Olo hanesan ema ida ne’ebé dedika nia moris ba servisu ba rai no povu, no nia legadu sei hela nafatin iha memória povu Timoroan sira.

“Hanoin ita hotu iha momentu ida-ne’e nu’udár Timoroan, nu’udár mós ema igreja ninian ita hotu iha momentu ida-ne’e ita sente loos duni ita lakon ho falesimentu sua exelénsia Francisco Guterres Lú-Olo ninian, ne’ebé ohin lori ita mai hamutuk iha ne’e atu fó ita nian omenajen  tanba ne’e mak ami na’in tolu hamutuk amu sira lori igreja nia naran, primeiru atu gradese ba nia sakrafisiu hotu ne’ebé halo ba rai ida-ne’e to’o ita ukun rasik aan,” Cardeal Virgílio do Carmo da Silva SDB.

Omenajen husi Amu Cardeal no Amo Bispu sira ne’e hatudu unidade entre Igreja no povu Timor-Leste iha momentu lutu nasional ida ne’e, no reafirma rekonesimentu ba kontribuisaun boot ne’ebé Francisco Guterres Lú-Olo fó ba nasaun no povu Timor-Leste.

Cardeal informa katak,  Bispu Dioseze Baucau, Dom Leandro Maria Alves  mak sei preside missa ba Maktoban Saudozu Lú-Olo nian iha  Igreja Katedrál, Díli,  Sesta 26 Juñu 2026.

Jornalista : Zita Menezes/Editór: Vito Salvadór