CAC Halo Sensibilizasaun Lei Medida Prevensaun no Kombate Korrupsaun Ba FP no Líder Komunitáriu sira

CAC halo sensibilizasaun kona-bá Lei Medida Prevensaun no Kombate Korrupsaun ba Funsionáriu Públiku (FP) no líder komunitáriu sira iha Munisípiu Díli, Kinta 18 Juñu 2026.

Díli, 18 Juñu 2026 (RAFA.TL)- Komisaun Anti Korrupsaun (CAC, sigla portugés), halo sensibilizasaun ba Lei Medida Prevensaun no Kombate Korrupsaun ba Funsionáriu Públiku (FP) no líder komunitáriu sira iha Munisípiu Díli nian.

Atividade ida-ne’e hola parte husi esforsu CAC nian atu hasa’e koñesimentu no konsiensializasaun públika kona-bá importánsia medida sira prevensaun no kombate korrupsaun nian iha servisu administrasaun públika nian, liu-liu ligadu ho esforsu sira Estadu nian ba polítika desentralizasaun no poder lokál ohin loron.

“Ita halo sosializasaun ida ne’e atu prevene no kombate korrupsaun, atu ita nia autoridade sira hala’o sira nia knar liliu kona-bá ezekuta orsamentu jerál estadu kada munisípiu nian tun to’o suku, ezekuta tuir planu asaun annual,” Komisáriu CAC, Rui Perreira ba jornalista sira iha salaun Autoridade Munisípiu Díli, Kinta (18/06/2026).

Komisáriu CAC ne’e informa kona-ba  programa  ne’e  sei halo konjunta  entre  CAC, Komisaun Funsaun Publika (KFP), Provedór Direitu Umanu no Justisa (PDHJ) ho Inspetór Jerál Estadu hodi  halo sensibilizasaun ba hasa’e koñesimentu ajénte públiku no setór privadu kona-bá papel CAC no enkuadramentu legal sira.

CAC halo ona akompañamentu ba projetu ne’ebé paradu iha munisípiu balun no mós Eskola Sekundáriu Jeral balun iha Díli, tanba tuir Lei Nú 07/2020 kona-bá Medida Prevensaun no Kombate Korupsaun.

Iha fatin hanesan Prezidenti Autoridade Munisípiu (PAM) Díli, Francisco dos Santos hatete orgullu ho prezensa  Komisaun Anti Korupsaun nian ne’ebé  partilla ona informasaun kona-ba medida Prevensaun no Kombate Korupsaun ba nia funsionariu sira ho autoriedade lokal sira.

“Autoriedade Munisípiu Dili ho nia elemntus sira mós simu orsamentu jerál estadu, entaun sira nia obrigasaun tenke mai para divulga mós ho elementu sira iha ne’e bele hatene hodi evita má-gastu admainistrasaun,” nia hateten.  .

Komsaun Anti Korrupsaun mós sei kontinua programa sensibilizasaun Lei Nú 07/2020 kona-ba Medida Prevensaun no Kombate Korupsaun  ba ajenta ajente públiku no Prezidenti Autoriedade sira seluk.

Jornalista: João Carlos/Editór: Vito Salvadór