Ouvir RAFA Ritmo, Voz e Coração de Timor
Díli, 11 Novembru 2026 (RAFA) – Prosesu estabelesimentu Banku Nasionál Dezenvolvimentu Timor-Leste (BNDTL) hein asinatura hosi Vise-Primeiru Ministru no Ministru Koordenadór Asuntu Ekonomiku, Francisco Kalbuadi Lay, Ministra Finansas, Santina Cardoso ho Ministru Planeamentu no Investimentu Estratéjiku (MPIE), Gastão Francisco de Sousa, molok submete dokumentu ofisiál ba Banku Sentral Timor-Leste (BCTL).
Ministru Planeamentu no Investimentu Estratéjiku (MPIE), Gastão Francisco de Sousa, iha Parlamentu Nasionál, Kuarta-ne’e, informa katak Governu haruka ona informasaun inisiál no dokumentu balun ba BCTL, maibé submisaun ofisiál presiza asinatura hosi ministru na’in-tolu.
“Agora hein de’it atu asina dokumentu ne’e. Ami na’in-tolu sei asina no haruka ba Banku Sentral atu husu aprovasaun lisensa, hodi bele opera banku ne’e,” hatete Ministru Gastão Sousa.
Governante ne’e adianta katak submisaun ba Banku Sentral presiza dokumentu no rekizitu barak, inklui prosesu hili membru Komisaun Ezekutiva no estrutura jestaun banku nian.
To’o agora, Ministru na’in-tolu seidauk halo diskusaun no desizaun finál kona-bá kandidatu sira ne’ebé sei okupa pozisaun importante iha BNDTL.
Tuir Ministru Gastão Sousa katak, ema ne’ebé sei lidera no jere banku foun ne’e tenke kumpre kritériu no ejijénsia Banku Sentral, liuliu iha área koñesimentu bankáriu, jestaun, kapasidade profisionál no personalidade, atu bele lori instituisaun finanseira ne’e ba oin.
Nia hatutan katak kritériu ne’ebé Banku Sentral estabelese, Governu kuaze kumpre ona, no agora sei fó atensaun ba prosesu selesaun ema sira ne’ebé sei responsabiliza ba jestaun BNDTL.
Iha parte seluk, Ministru Gastão Sousa relata katak Governu sei uza edifísiu CNA, nu’udar instalasaun temporária ba BNDTL, liuhosi prosesu aluga edifísiu ne’e. Maibé, desizaun kona-ba utilizasaun edifísiu ne’e sei diskute hamutuk ho Ministra Finansas no Vise-Primeiru-Ministru.
Nia mós konfirma katak Governu aloka ona orsamentu mínimu US$30 Millaun ba estabelesimentu banku foun ne’e liuhosi rezolusaun Governu, osan ne’e transfere ona ba konta banku nian, gora hein de’it ema sira atu mai jere banku refere.
Kona-bá estrutura administrasaun, Ministru Gastão Sousa hatete Konsellu Administrasaun BNDTL sei kompostu hosi membru na’in-hitu, inklui membru na’in-tolu reprezentante Governu no membru na’in-haat seluk.
Ministru ne’e hein katak BNDTL bele estabelese no hahú opera iha tinan 2027, depois Governu finaliza prosesu submisaun no hetan aprovasaun lisensa hosi Banku Sentral.
Nia mós rekoñese katak dezafiu prinsipál ne’ebé Governu enfrenta durante prosesu preparasaun mak selesaun rekursu umanu. Tanba, banku foun ne’e presiza ema ho kapasidade, integridade no esperiénsia adekuada atu kaer responsabilidade iha jestaun instituisaun bankária.
Jornalista: Cesarina de Carvalho
Written by: RafaFM
BNDTL Hein Asinatura Ministru Na’in-Tolu Molok Submete Ba BCTL
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt