Bankada PLP ho CNRT Husu Komisaun Rekrutamentu Foun Ba Kadete PNTL Servisu ho Transparánsia

Xefe Bankada PLP Deputada Maria Angelina Sarmento.

Díli, 16 Setembru 2026 (RAFA)- Membru Parlamentu Nasionál husi Bankada Partidu Libertasaun Popular no Congresso Nacional de Reconstrução de Timor-Leste (CNRT) husu komisaun rekrutamentu kadeta foun Polísia Nasionál Timor-Leste (PNTL) tenke aprende husi fallansu antes ne’e hodi kontinua halo servisu ho transparánsia.

Xefe Bankada PLP Deputada Maria Angelina Sarmento ba jornalista sira iha PN,  Kuarta-ne’e,  husu komisaun rekrutramentu PNTL tenke aprende husi lisaun apredisajen ne’ebé sira halo ona iha tinan kotuk kona-bá fallansu totál ba rekutramentu kadetas foun PNTL ne’ebé hamosu falta konfiansa husi públiku tanba laiha transparánsia no akontese irregularidade.

“Aprende husi fallansu ida-ne’e tanba instituisaun estadu RDTL la’ós unipesoál,Lda ne’ebé ema ida halo ona faillansu nunka aprende husi faillansu, hodi hadi’a ba futuru, entaun ha’u lamenta tebes sé karik informasaun ne’ebé mak ita-boot sira hato’o katak iha ona dadus ne’ebé prová katak barak mak la prenxe rekejitu no balu hanesan familia iha indonézia,” hatete Deputada Maria Angelina Sarmento.

Reprezentante povu ne’e haktuir nia parte hakarak hato’o la mentasaun ba Ministériu Interiór ne’ebé laiha kapasidade hodi membru sira hodi impoen regra sira hanesan nasaun demokratikú ne’ebé tenke hakruuk ba regra hodi ema hotu bele la’o tuir regra sira ne’ebé mak apliká iha prosesu rekrutamentu.

Sorin seluk, Xefe Bankada CNRT, Patrocino Fernandes dos Reis hatete, nia parte seidauk bele fó komentáriu, tanba seidauk asesu ba  lista foun ba ba kadeta PNTL  ne’ebé hatete katak loos kalae iha duni sidadaun estranjeiru ne’ebé naran sai iha hotu iha lista referé.

“Informasaun sira ne’e sai hanesan xamada atensaun ida ba entidade sira ne’ebé responsabiliza ba prosesu rekrutamentu ne’e, hodi haree didi’ak ninia prosesu sira ne’e ho di’ak hodi. Atu ita hanoin katak labele tama ba prosesu sira falla administrativa,” hatete Deputadu Patracino Fernandes.

Reprezentante povu ne´e hatutan, klaru rekrutamentu kadetas foun ba PNTL ne’e ba Timoroan, no klaru  Governu hatuur regras no regulamentu rigorozu ba prosesu rekrutamentu kadetas foun PNTL nian.

Deputadu ne´e rekomenda ba komisaun rekrutamentu tenke respeitu iha regra no prosedimentu sira ne’ebé hatur iha matadalan sira rekrutamentu sira ne’e buka atu nakloke ba hotu-hotu atu halo observasaun hodi asegura katak prosesu sira ne’e bele la’o duni tuir espetativa ema hotu nian. Nune’e  bele to’o duni ba objetivu ida ne’ebé mak governu hakarak atu atinje no reforsa instituisaun seguransa ninian liuliu ba PNTL atu reforsa rekursu para fortifika di’ak liu tán servisu seguransa ba estadu no ba povu.

Jornalista : Zita Menezes