Bankada Parlamentár Hato’o Sentidu Kondolénsia Profunda Ba Falesimentu Francisco Guterres “Lú-Olo”

Bankada sira iha Parlamentu Nasionál, Segunda (22/06/2026), Hato’o Sentidu Kondolénsia Profunda Ba Falesimentu Francisco Guterres “Lú-Olo”.

Díli, 22 Juñu 2026 (RAFA.TL)- Bankada Parlamentár CNRT, PD, FRETILIN, PLP no KHUNTO hato’o sira-nia sentimentu triste kle’na ba falesimentu saudozu Francisco Guterres “Lú-Olo” ne’ebé hakotu iis iha Ospitál Price Court iha Kuala Lumpur, Malázia iha tuku 22:00 PM oras Malázia, Domingu (21/06/2026).

“Ohin, tanba eis-Prezidente Repúblika no mós eis-Prezidente Parlamentu Nasionál mate, ha’u propoin ita halo um minutu selénsiu,” Prezidente Parlamentu Nasionál (PPN) Maria  Fernanda Lay deklara iha plenária PN, Segunda (22/06/2026).

Prezidente Parlamentu Nasionál (PPN) Maria  Fernanda Lay, hatutan, serimonia fúnebre ba saudozu Francisco Guterres Lú-Olo estadu mak sei toma konta ne’ebé PPN espera katak husi Bankada FRETILIN bele fó dadus hodi nune’e Parlamentu Nasionál bele elebora votu pezár.

Xefe  Bankada CNRT, Patrocino dos Reis Fernandes liuhosi nia intervenzaun lori estrutura tomak Bankada CNRT hato’o sentidu kondelénsia ba povu Timor-Leste no família boot Bankada FRETILIN  tanba lakon  lidér istóriku   Saudozu Francisco Guterres Lú-Olo.

“Lori Bankada CNRT nia naran no mós estrutura tomak, militante partidu CNRT tomak hato’o ami nia profunda sentidu kondelénsia ba povu Timor-Leste, ba faíilia boot FRETILIN espesial ba família Munisípiu Viqueque ne’ebé lakon lidér estadu, lidér nasaun espesáal mós lidér ba Munisípiu Viqueque no lidér partidu FRETILIN,” Deputadu Patrocino Fernandes hateten.

Xefe Bankada Partidu Demokratikú (PD), Armando dos Santos Lopes liuhosi nia intervensaun lori Partidu PD nia naran hato’o sentidu kondelénsia ba lidér istorikú  Saudozu Fracisco Guterres Lú-Olo nia falesimentu.

“La’ós lori naran pesoál, maibé lori naran Partidu Demokratikú ne’ebé ohin loron ita rona katak situsaun tristeza ida ba ita nia kamarada ka eis Prezidente Parlamentu Nasionál, eis Prezidente Repúblika, sé posível ita nia agenda seluk ita bele hapara maibé ita bele hakat ba ajenda prepara ita nian aan para aban karik mai ita bele simu go ita nia tristeza,” dehan Deputadu Armando dos Santos Lopes.

Membru PN husi Bankada FRETILIN, David Dias Ximenes Mandati  liuhosi nia interevenzaun hatete iha tempu triste ida-ne’e no laran moras ida-ne’e  tanba lakon kamarada Prezidente partidu FRETLILN Francisco Guterres Lú-Olo Bankada FRETILIN hato’o agradese boot ba solidariédade no liafuan konforte ida ne’ebé husi maluk Partidu CNRT, Partidu PD no partidu sira seluk tán.

Jestu fraternidade hanesan ne’e hatudu katak, liuhosi diferénsia polítiku sira ema hotu hamutuk nafatin iha valor umanizmu respeita malu no rekoñesimenntu ba ema sira ne’ebé dedika aan ba moris povu no nasaun ida-ne’e.

“Memoria kamarada Prezidente Lú-Olo sei moris nafatin iha ita nian laran no hanoin povu Timor-Leste no nia legadu sei sai inspirasaun ba jerasaun tuir mai, ami agradese tebes ba solidariedade no apoiu ne’ebé ami presiza tebes duni husi ita-boot sira hatudu iha momentu lutu omenajen ida-ne’e,” tenik Deputadu David Ximenes Dias “Mandati”

Xefe Bankada PLP, Deputada Maria Angelina Sarmento konsidera  katak eis-Prezidente Repúblika Francisco Guterres Lú-Olo nia falesimentu  nu’udár lutu nasionál ba estadu Repúlika Demokratika Timor-Leste (RDTL).

“Ohin,  loron ita tenke konsidera hanesan lutu nasionál ba Repúblika Demokrátika Timor-Leste (RDTL), tanba ita lakon eroi boot ida, lidér nasionál ida, nune’e ha’u husu sé bele ajenda sira hotu ita suspende ita bele hili de’it ajenda prioridade sira para ita hala’o,” tenik Deputada.

Nune’e Xefe Bankada KHUNTO Deputadu António Verdial de Sousa sekunda, tanba Timor-Leste iha lutu nia laran  tanba ne’e husu Parlamentu Nasionál atu foka ba ajenda sira ne’ebé relasiona ho  Prezidente Repúblika Francisco Guterres Lú-Olo nia falesimentu.

Hafoin reuniaun plenária Prezidente Parlamentu Nasionál kontinua kedan halo enkontru ho lidér Bankada sira hodi prepara Parlamentu Nasionál nia ajenda  hodi  simu saudozu Francisco Guterres Lú-Olo nia mate isin no prosesu tomak sei la’o  tuir ajenda estadu nian.

Jornalista : Zita Menezes/Editór: Vito Salvadór