Autoridade Timoroan Kaptura Ema Estranjeiru Na’in-62

Autoridade Timoroan kaptura sidadaun estranjeiru na'in-62 iha área Kampu Baru, Díli, Segunda-kalan 27 Jullu 2026.

Díli, 27 Jullu 2026 (RAFA.TL) – Autoridade Timoroan, kompostu husi Polísia Nasionál Timor-Leste (PNTL), liu husi  Diresaun Servisu Investigasaun Kriminál (DSIK),  Servisu Migrasaun no ekipa Intelijénsia, kaptura tan sidadaun estranjeiru na’in-62 iha área Kampu Baru, Díli.

Operasaun autoridade Timoroan nian iha Segunda-kalan ne’e, deteta no dezmantela atividade ilísitu ne’ebé iha relasaun ho rede scam call centre.

Liu hosi identifikasaun, autoridade Timoroan sira deskobre  katak ema estranjeiru sira-ne’e, na’in-33 ho nasionalidade Filipina, na’in-28 Indonéziu no na’in-ida husi India.

Sidadaun estranjeiru sira ne’e na’in-23 laiha pasaporte (pasaporte iha hela ajénsia ne’ebé trata ka fasilita sira tama mai Timor-Leste) no na’in-39 pasaporte iha liman.

Operasaun ne’e hala’o hafoin autoridade sira simu informasaun no halo investigasaun durante loron balu kona-bá movimentu ema estranjeiru hirak ne’e nian ne’ebé  otél ida iha área refere hanesan fatin ba atividade ilísitu scam call centre.

Autoridade sira halo apreensaun ba ekipamentu eletróniku sira, hanesan komputadór, telemóvel, router internet, no dokumentu sira ne’ebé sei  sai evidénsia ba investigasaun.

Sidadaun estranjeiru sira ne’e transporta kedas ba iha Komandu Jerál PNTL  hodi submeter ba interrogatóriu no verifikasaun. Nune’e, bainhira iha evidénsia sufisiente sei entrega kazu ne’e ba Ministériu Públiku atu kontinua prosesu legál.

Jornalista: João Carlos