Atualizasaun Rai-Nakdoko iha Flores, Ema Na’in-38 Lakon Vida

Kondisaun atuál iha Flores hafoin rai-nakdoko ho magnitude 7.7, Sábadu 15 Agostu 2026. Imajen//Supply

Flores, 15 Agostu 2026 (RAFA)– Ajénsia Nasionál Jestaun Dezastre (BNPB, sigla Indonézia)  fó sai atualizasaun ikus sira hafoin rai-nakdoko ho magnitude 7.7 iha  Rejiaun Flores, Nusa Tenggara Timur (NTT) rezulta pelumenus ema na’in-38 lakon vida.

“To’o tuku 15:00 oras timor osidentál, ema na’in-38  lakon vida, na’in-rua kanek todan, no na’in-11 hetan kanek kmaan,”  Xefe BNPB Suharyanto  informa,  Sábadu-ne’e.

Suharyanto konfirma mós katak ema na’in 2,000 seluk maka foti  inisiativa  rasik hodi evakua ba fatin sira ne’ebé seguru liu. Infraestrutura prinsipál sira hanesan estrada, uma privadu no repartisaun públiku sira barak hetan estragu.

“Maizumenus ema rihun rua maka evakua ona ho sira-nia inisiativa rasik,”  Xefe BNPB Suharyanto   haktuir.

Rai-nakdoko ho magnitude 7.7 akontese iha  Nagekeo,  Flores, NTT, hale’u tuku 4:58 dadeer, oras timor osidéntal.

BMKG Deklara Alerta Tsunami Remata

Ajénsia Meteorolojia, Klimatolojia, no Jeofízika (BMKG, sigla Indonézia) deklara ona alerta antisipada tsunami  remata  ona.

“Alerta antisipada hosi tsunami ne’ebé provoka hosi rai-nakdoko ho magnitude 7.7, ho data 15 Agostu 2026  hale’u tuku 04:58 oras timor osidentál, deklara hotu ona”, anúnsia hosi BMKG liuhosi nia kanál ofisiál.

Rai-nakdoko ne’e akontese iha tuku 04:58 dadeer oras timor osidentál ho nia episentru iha rejiaun Flores. Rai-nakdoko ne’e akontese iha kilómetru 30 nordeste Mbay, Nagekeo, NTT, ho profundidade kilómetru 15.

BMKG antes ne’e fó sai alerta antesipada kona-bá tsunami no tau área oioin iha estatutu alerta no kuidadu. Alerta sira-ne’e fó sai hafoin rai-nakdoko iha potensiál hodi hamosu tsunami.

Kontribuidór RAFA