Atualizasaun Rai-Nakdoko Flores, Númeru Ema Mate Sa’e Ba Na’in-70

Vítima kanek todan no kanek kaman sira kauza husi rai -nakdoko iha Illa Flores, NTT-Indonézia hetan asisténsia médiku.

Flores, 19 Agostu 2026 (RAFA) – Númeru ema mate tanba rai-nakdoko maka’as iha Flores, Nusa Tenggara Timur (NTT), sa’e ona ba na’in-70.

Númeru ne’e bazeia ba dadus atualizadu ne’ebé kompila hosi Ajénsia Nasionál Buska no Resgate (Basarnas, sigla indonézia) to’o Segunda, 17 fulan-Agostu-ne’e iha tuku 13:00 oras timor osidentál.

Diretór Operasaun Basarnas, Kontra-Almirante Yudhi Bramantyo, informa númeru totál vítima sira ne’ebé rejista atinji ona 202. Husi totál vítima sira, na’in-70 lakon vida, na’in-40 sofre kanek todan, no na’in-92 kanek kmaan.

“To’o loron datoluk, horiseik, iha tuku 11:30 kalan oras timor osidentál, númeru totál vítima sira ne’ebé ami halibur ona atinji ona 202. Ema na’in-70 lakon vida no ema na’in-132 sofre kanek,” Yudhi  hateten hanesan RAFA sita iha komunikadu ofisiál, Kuarta-ne’e.

Tama ba loron dahaat resposta pós-dezastre nian, ekipa konjunta SAR nian foka hela hodi buka área afetadu oioin.

Buska ida-ne’e hala’o hafoin Basarnas konfirma katak laiha tan relatóriu sira kona-bá abitante sira ne’ebé lakon. Aleinde operasaun buka, Basarnas mós hametin hela apoiu ba fasilidade saúde ba komunidade, liuliu iha área sira ne’ebé susar atu to’o.

Servisu médiku ne’ebé aumenta ne’e deside hafoin ekipa Basarnas akompaña Ministru Interiór Tito Karnavian hodi halibur input husi abitante sira iha área Manggarai, inklui Distritu Lamba Leda.

Atu apoia aselerasaun asisténsia médiku, Basarnas koloka ró KN SAR Antareja 233 husi Gabinete SAR Kupaun. Ró ne’e tula pesoál médiku konjuntu na’in-40 hosi voluntáriu Kodam IX/Udayana no Asadoma ne’ebé sei destaka diretamente hodi atende komunidade  afetadu iha área Manggarai.

Kontribuidór RAFA