Atividade Scam Call Centre Ilegál, IGJ Husu Komunidade Koopera Hodi Kombate Jogu Ne’e

Inspetór Jerál Jogu (IGJ, sigla portuges), Anibal Carvalho.

Díli, 14  Jullu  2026 (RAFA.TL)- Inspetór Jerál Jogu (IGJ, sigla portuges),  Anibal Carvalho, deklara atividade scam call centre illegal, nune’e husu komunidade atu koopera ho autoridade seguransa no parte kompetente hodi kombate jogu ílisitu ne’e iha Timor-Leste.

Inspetór Jerál Jogu, Anibal Carvalho ba jornalista sira iha Bebora, Díli, Tersa-ne’e hatete, scam call centre hanesan atividade ilegál ne´ebé maka agora dadaun ne´e Polísia Nasionál Timor-Leste (PNTL) no Polísia Sientifiku Investigasaun Kriminál (PCIC)  dezmantela no kaptura suspeitu sira iha fatin-fatin, liu-liu iha semana rua ikus ne’e, iha Díli laran ho iha Ulmera ho Tibar-Liquiça.

“ita hotu hatene katak atividade scamming ne’ebé mak barak tebes iha ita nia rain laiha ligasaun ho inspesaun jeral jogu nia servisu. Ita hotu hatene katak Inspesaun Jerál Jogu nia servisu maka atu kontrola deit jogu ne´ebé mak legal, hetan autorizasaun husi Governu,” Anibal Carvalho hateten.

Nia hatutan, jogu Scam Call Centre ne’ebé agora la’o ilegalmente iha teritoriu nasioál sira ne´e la’ós kompeténsia IGJ nian, maibé iha liña koordenasaun nafatin ho parte seguransa liu-liu PNTL no PCIC atu nune´e kontinua buka nafatin atividade ilegal ka ilísitu sira ne´e hodi bele kombate hotu.

Nia argumenta atividade scamming ne´e laiha ligasaun ho IGJ nia servisu no bazeia ba dekretu lei nú. 6/2016 ne’e call centre ka scaming ne´e la tama iha ne´eba, no jogu online sira ne´e iha 2025 Konsellu Ministru hasai ona rezolusaun nú. 54 Outubru 2025 hodi taka  totalmente.

“Scaming ne´e manipulasaun, ema scammer sira uza call centre ba halo atividade scamming hodi bosok ita nia sidadaun sira, no la’ós ne’e deit maibé sira mai uza Timor sai hanesan knuuk ka abrigu ba sira nia atividade scamming para atu bele bosok ema husi rai-liur liu husi mensajen no telefone,” nia hateten.

Inspesaun Jerál Jogu kontinua alerta ba komunidade sira atu kolabora ho autoridade seguransa hodi nafatin matan moris no neon nain, karik deskonfia sidadaun estranjeiru sira ne´ebé halo atividade iha relasaun ho scam call centre bele  informa ba autoridade hodi kaptura atu evita komunidade sira rasik sai vitima ba jogu ilísitu sira ne´e.

Jornalista: Elio dos Santos/Editór: Vito Salvadór