Assalam F.C Promete Fó Surpreza Ba Karketu Díli F.C iha Jogu Meiu-Finál Taça da Liga

Ekipa Assalam F.C iha Taça da Liga 2025. Imajen/Rafa.tl

DILI, RAFA.tl– Ekipa Assalam F.C promete hatudu jogu ne’ebé furak ba adeptu sira no sei halo mós surpreza ba Karketu Díli F.C iha jogu meiu-finál Taça da Liga iha Estádiu Munisipál Díli,  Domingu (15/02/2026).

Notísia Relevante: Taça da Liga, Assalam F.C Halakon Nia Adversáriu Nagardjo F.C ho Skor 1-0

Treinadór Assalam F.C, Adu Marques Nami Ruru, Kinta (13/02/2026), liuhusi konferénsia imprensa, hateten nia ekipa sei hatudu jogu ida atrativu no halo atake barak ba nia adversáriu Karketu Díli FC, tanba iha preparasaun másimu hodi kompete no sei hatudu surpreza ba adeptu sira ho Karketu Díli F.C.

Hanesan hotu-hotu hatene katak, Karketu ne’e klubu ne’ebé mak jigante, foin dau-dauk tinan kotuk sira kampiaun ba Liga Timor, Adu Marques Nami Ruru  hatutan, atu enfrenta Karketu Díli FC  la’os fásil, tenke prepara mentál, tékniku, fíziku, no prepara buat barak.

“La’ós garantia porsentu 100  atu halakon Karketu Díli FC, maibé ami mós iha tátiku, tanba joga ne’e la’os dala ida de’it, maibé joga dala rua, ne’ebé ami mós sei halo surpreza ida iha Estádiu Munisipál, Domingu (15/02/2026,”  Adu Marques Nami Ruru hateten

Nia hatutan, Assalam FC  sei hatudu jogu di’ak ba jogu hasoru Karketu Díli FC no nia la promote ho surpereza ne’e atu fó golu iha ba rede Karketu Díli FC, maibé sei halo surpreza di’ak.

Treinadór, Karketu Díli F.C, Barnard Taye konsidera mós Assalam F.C nu’udar ekipa ne’ebé forte, maibé dezde prinsipiu Karketu Díli FC  mai ho ambisaun  forte sai kampiaun ba troféu Taça da Liga tanba ne’e tenke manan Assalam FC iha jogu meia-finál ne’e.

“Kona-bá jogu ne’ebé sei mai, ha’u observa ona Assalam no ha’u fiar katak sira mós ekipa ida ne’ebé di’ak tebes. Ha’u iha respeitu boot ba sira.  Maibé, tátikamente, ami preparadu tomak,  ami fiar-an, pozitivu, no determinadu atu manán jogu,” Barnard Taye afirma.

Tuir oráriu jogu entre  ekipa Assalam F.C no Karketu Díli F.C sei hala’o iha Estádiu Munisipál Díli, Domingu 15 fulan-Fevereiru  ne’e, tuku 18:00 Otl.

Notísia Relevante: Taça da Liga, Karketu Díli F.C Festa Golu Kontra Santa Cruz F.C ho Skor 8-1

Reportajen ekipa Rafa.tl