Ouvir RAFA Ritmo, Voz e Coração de Timor
Díli, 20 Outubru 2026 (RAFA) – Ministériu Agrikultura, Peska, Pekuária no Floresta (MAPPF) sei halo ajustamentu ba orsamentu bens servisu ho montante miliaun 2.4 USD aloka ba atividade perfurasaun bee-moos nu’udar medida preparasaun hodi antisipa impaktu husi fenomenu El Niño ne’ebé bele hamenus disponibilidade bee iha rai laran.
Ministru Agrikultura, Peska, Pekuária no Floresta, Marcos da Cruz ba jornalista sira, iha Parlamentu Nasionál, Segunda ne’e, katak governu dadaun ne’e halo ona diskusaun kona-bá senáriu no medida preparasaun sira atu enfrenta impaktu husi El Niño, ne’ebé bele afeta Timor-Leste.
Nia mós haktuir diskusaun ne’e inklui mós utilizasaun orsamentu bens servisu ne’ebé seidauk ezekuta hotu iha tinan 2026, atu identifika parte husi osan ne’e bele rediresiona ba nesesidade urjente, liuliu atu asegura disponibilidade bee.
“Orsamentu bens servisu ne’ebé ita hotu haree ne’e, ita bele identifika fatin sira ne’ebé karau sira ba han. Ami buka atu bele halo perfurasaun ka utiliza bee iha rai okos, se iha posibilidade. El Niño nia impaktu mak redusaun ba bee,” informa Ministru Marcos da Cruz.
Governante ne’e hatutan impaktu husi El Niño la’ós de’it afeta disponibilidade bee ba komunidade, maibé mós bele hamenus bee ba animál doméstiku no animál fuik sira.
MAPPF hahú halo preparasaun atu asegura bee iha fatin sira ne’ebé presiza, inklui konsidera posibilidade atu halo perfurasaun bee iha área ne’ebé apropriadu.
Ministériu sei haree mós nesesidade ekipamentu sira ne’ebé bele ajuda guarda floresta atu kombate inséndiu iha área foho no rai tetuk, ne’ebé bele sai risku durante períodu ho kondisaun maran.
Ministru Marcos da Cruz konfirma katak montante millaun 2.4 USD iha orsamentu bens servisu sei sai baze ba ajústamentu ne’e, maski la’ós orsamentu tomak sei aloka ba atividade perfurasaun bee.
“Orsamentu bens de servisu nia sei iha Miliaun 2.4 USD husi ida-ne’e, sei halo ajustamentu atu la’ós hotu-hotu ba. Maibé ajusta parte ida ba asuntu perfurasaun bee ne’e,” tenik Ministru ne’e
Iha parte seluk, ministru ne’e haktuir katak preparasaun atu enfrenta El Niño sei la limita de’it ba MAPPF, maibé sei envolve mós koordenasaun ho parseiru dezenvolvimentu sira.
Koordenasaun ne’e importante atu diskute knaar no responsabilidade husi parte hotu-hotu, hodi asegura katak medida preparasaun sira bele responde ho efetivu ba risku ne’ebé bele mosu tanba fenomenu El Niño.
Jornalista: Remigia Locatelli
Written by: RafaFM
Ministériu Agrikultura Pekuária no Floresta (MAPPF) Peska
todayNovember 20, 2026 12 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt