Ouvir RAFA Ritmo, Voz e Coração de Timor
Díli, 17 Novembru 2026 (RAFA) — Autoridade Nasionál Petróleu (ANP) ho Minstériu Petroleu no Rekursu Minirál (MPRM) akompaña besik sentru abastesimentu kombustivel balu iha kapitál Díli estoke mamuk, maibé situasaun la’o normal hela tanba iha koordenasaun di’ak ho empreza fornesidór rua hanesan Esperança Timor Oan (ETO) ho Pertamina Internasional Timor SA (PITSA).
Prezidente ANP, Gualdino do Carmo da Silva, ba jornalista sira, hateten ANP haree realidade estasaun ka sentru abastesimentu kombustivel balu laiha estoke, liuliu gazolina.
‘’Ami haree katak iha estasaun abastesimentu kombustível balun ne’ebé laiha kombustível, liuliu gazolina. Estasaun balun la konsege fó servisu hanesan baibain, no balun tenke taka temporariamente. Maibé, Ami ko’alia nafatin ho operadór rua, ETO no PITSA atu hatene problema ne’e iha ne’ebé,’’ Prezidente ANP, Gualdino do Carmo da Silva, hateten ba jornalista sira iha Salaun Multiuzu, Díli, Tersa-ne’e.
Nia salienta katak husi parte importadór kombustivel ni’an-rua (ETO ho PITSA) laiha mudansa signifikativa no volume mina tama nafatin hanesan baibain. Tanba ne’e, ANP buka hela kauza husi atrazu distribuisaun ne’e, inklui haree posibilidade kestaun tékniku ka kontratu entre operadór no distribuidór sira.
ETO rasik informa ona liuhusi nia konta Facebook ofisiál, ETO Moving Energy, katak ETO nia rezerva kombustível sufisiente atu garante abastesimentu ba ETO nia kliente sira durante Novembru, Dezembru, Janeiru no fulan sira tuirmai.
“Postu balu ne’ebé agora hasoru falta kombustível hetan abastesimentu husi fornesedór seluk. Iha rede Distribuisaun ETO, abastesimentu kontinua ho normalidade. Ita bele sosa ho kalma, tuir nesesidade loroloron. Obrigadu ba ita hotu nia konfiansa!”.
Kona-bá kontrolu presu iha merkadu, ANP garante katak to’o agora seidauk iha empreza ruma ne’ebé halo manipulasaun ba presu kombustível, liuliu kombustível ne’ebé hetan subsídiu husi Governu.
“Obrigadu ba Maromak, to’o ohin loron ita konsege kontrola situasaun ne’e. Operadór sira labele manipula presu, no ita bele dehan katak laiha kompañia ida mak halo manipulasaun presu iha territóriu tomak,” prezidente ANP, Gualdino do Carmo da Silva afirma.
Atu asegura estabilidade distribuisaun no presu iha territóriu laran tomak, ANP estabelese ona ekipa konjunta ida ne’ebé envolve mós Polísia Nasionál Timor-Leste (PNTL) hodi halo fiskalizasaun no simu keixa diretamente husi distribuidór no konsumidór sira.
Jonalista: Remigia Locatelli
Written by: RafaFM
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt