ANC Sei Kolabora ho Starlink-SAP Hametin Kontrolu Ba Operadór Telekomunikasaun iha Timor-Leste

ANC halo enkontru ho Starlink-SAP iha Díli, Kuarta 26 Agostu 2026.

Díli, 26 Agostu 2026 (RAFA) – Prezidente Autoridade Nasionál Komunikasaun (ANC), Flávio Cardoso Neves, hatete katak ANC sei halo koordenasaun ho Starlink iha rejiaun Ásia-Pasífiku (Starlink-SAP) atu aproveita dezenvolvimentu teknolojia komunikasaun liuhosi satélite hodi hametin monitorizasaun no fiskalizasaun ba operadór telekomunikasaun sira ne’ebé hala’o atividade iha Timor-Leste.

Flávio Cardoso Neves ba jornalista sira iha Ministériu Transporte no Komunikasaun,  Kuarta-ne´e hatete, kooperasaun ne’e importante atu ajuda ANC akompaña operadór no provedór servisu telekomunikasaun sira, inklui Starlink Timor-Leste, Borokai no Gardamor, no asegura katak ekipamentu no sistema sira ne’ebé uza iha Timor-Leste rejista no kumpre ho regra regulatória.

“Responsável ba rejiaun Ásia-Pasífiku mai ita halo koordenasaun. Importante ANC akompaña sira ne’ebé iha ligasaun ho Starlink Timor-Leste, Borokai no Gardamor. Sira tenke halo koordenasaun internamente di’ak atu bele ajuda reguladór hatene operasaun, sasán no ekipamentu sira ne’ebé eziste iha Timor-Leste,” Flávio Cardoso Neves hateten.

Nia esplika katak ANC presiza identifika ekipamentu no sistema telekomunikasaun sira ne’ebé hala’o  iha territóriu Timor-Leste, liuliu ekipamentu ne’ebé seidauk rejista, atu garante katak hotu kumpre ho regra no padraun tékniku ne’ebé determina.

“Bainhira ita husu sira atu kolabora, objetivu mak atu bele kontrola ekipamentu sira ne’ebé tama no uza iha Timor-Leste. Se ekipamentu ida la kumpre ho regra, ANC bele halo fiskalizasaun no medida tuir kompeténsia regulatória,” nia hatete.

ANC mós sei fó atensaun ba kontéudu no plataforma dijitál sira ne’ebé bele fó impaktu ba seguransa no interese públiku, inklui pornografia no atividade jogu online ne’ebé ilegál.

Nia dehan bainhira iha website ka plataforma ne’ebé labele hetan asesu husi ema hotu, hanesan site pornografia ka game online,  bele buka dalan atu halo blokéiu, hodi garante katak utilizasaun ekipamentu no servisu telekomunikasaun sira bele hala’o ho diak no asesu ba informasaun ne’ebé fó benefísiu ba públiku.

Prezidente ANC subliña katak responsabilidade regulatória kona-ba operadór telekomunikasaun iha Timor-Leste sei nafatin iha ANC. Kooperasaun ho Starlink Ásia-Pasífiku sei sai apoiu tékniku no koordenasaun atu hametin kapasidade ANC iha monitorizasaun no fiskalizasaun.

Kooperasaun ne’e, bainhira implementa, bele foka ba monitorizasaun téknika, partilla informasaun, kontrolu ekipamentu, melhoria konektividade no apoiu ba fiskalizasaun setor telekomunikasaun.

ANC espera katak esforsu ne’e bele kontribui ba dezenvolvimentu setor telekomunikasaun ne’ebé transparente, kompetitivu, seguru no ho qualidade servisu diak, hodi garante konsumidór sira hetan asesu ba servisu internet ne’ebé fiável no kumpre ho padraun regulatória iha Timor-Leste.

Jornalista: João Carlos