AMTL Kapasita Mediku Sira Atende Pasiente Sofre Trauma Fíziku

AMTL fasilita formasaun ba mediku na’in-15 kona-bá atendimentu pasiente sofre trauma fíziku no asidente tráfiku, Sesta 11 Setembru 2026.

Díli, 11 Setembru 2026 (RAFA) – Asosiasaun Médiku Timor-Leste (AMTL) fasilita formasaun ba mediku na’in-15 kona-bá atendimentu pasiente sofre trauma fíziku no asidente tráfiku.

Formasaun ne’e AMTL realiza ho objetivu atu hasa’e kapasidade médiku sira ne’ebé halo atendementu iha área emerjénsia.

Prezidente AMTL, Herculano Seixas, Sesta-ne’e, informa katak treinamentu ne’e importante atu fó koñesimentu no abilidade téknika ba médiku sira kona-ba abordajen sistemátika ba pasiente ne’ebé sofre trauma fíziku, inklui vítima asidente tráfiku no kazu trauma seluk.

Nia esplika, médiku sira presiza hatene oinsá atu uza rekursu ne’ebé disponívél iha fatin servisu hodi fó atendimentu no intervensaun inisiál lalais ba pasiente trauma, ho objetivu atu prevene situasaun ne’ebé bele ameasa vida.

“Alvu ba treinamentu ida-ne’e mak médiku na’in-15 husi munisípiu sia (9), sentru saúde internamentu no balu husi sentru saúde iha postu administrativu,” Herculano Seixas hateten.

Prezidente AMTL ne’e hatutan  ba munisípiu sira ne’ebé seidauk envolve iha formasaun ne’e, sira sei konvida iha faze daruak ne’ebé sei realiza iha fulan Outubru ne’e.

Nia mós haktuir médiku sira ne’ebé partisipa iha formasaun ne’e mai husi munisípiu Ainaro, Aileu, Ermera, Liquiçá, Manatuto, Oé-Cusse, Baucau, Manufahi no Díli.

Alende ne’e númeru partisipante ba treinamentu ida-ne’e limita ba ema na’in 15. Tanba, atividade ne’e inklui sesaun teórika, prátika no simulasaun kona-ba kazu trauma, ne’ebé presiza grupu ki’ik atu fasilita prosesu aprendizajen.

Nia hatete formadór sira kuaze hotu-hotu Timoroan, no sira ne’ebé iha esperiénsia iha área anestesia no sirurjia. Formadór sira hetan formasaun iha rai li’ur no sertifikasaun atu sai formadór iha área ne’e.

Iha tinan 2026, AMTL hetan apoiu finanseiru husi GASC hamutuk US$ 20 mil atu apoia programa kapasita profisionál médiku sira no reforsa instituisaun iha munisípiu sira.

Herculano agradese ba GASC tanba apoiu ne’e la’ós de’it ba treinamentu, maibé mós suporta atividade AMTL nian iha Munisípiu sira.

AMTL mós halo sosializasaun kona-bá programa, estatutu no regulamentu instituisaun nian. Ne’e inklui formasaun kuidadu emerjénsia báziku ne’ebé sei realiza iha fulan Outubru, no kontinua atividade AMTL nian iha munisípiu Baucau no Ainaro.

“Orsamentu ne’ebé aloka mai la’ós atu halo atividade ida de’it, maibé ba atividade lubuk ida iha munisípiu no mós iha Dili,” prezidente AMTL subliña.

Iha fatin hanesan, formadór no nu’udar mós espesialista iha sirurjia, João Pedro hatete treinamentu kona-ba kuidadu primáriu ba trauma hahú ona tinan barak liu bá, no dezde tinan kotuk AMTL hahú involve formadór Timoroan sira iha prosesu formasaun.

Nia relata, to’o agora programa ne’e treina ona médiku no profisionál saúde na’in 75 iha territóriu Timor-Leste tomak. Importánsia husi treinamentu ida-ne’e mak atu prepara médiku sira bele fó asisténsia ba vítima trauma fíziku, inklui oinsá atu halo atendimentu no uza sasán báziku ne’ebé disponívél iha fatin sira ne’ebé sira servisu.

“Ami hanorin prinsípiu kona-ba oinsá atu halo manajementu trauma, nune’e sira bele utiliza fasilidade saida de’it ne’ebé iha atu fó atendimentu ba vítima sira,” tenik João Pedro.

Nia espera katak, liuhusi formasaun ne’e, médiku sira bele aplika konñesimentu no abilidade ne’ebé sira aprende iha fatin servisu ida-idak, inklui iha área ne’ebé fasilidade médika limitadu.

João Pedro mós relata programa ne’e bele kontinua no envolve médiku barak liután, atu bele hasa’e asesu komunidade ba atendimentu inisiál ba vítima trauma.

Jornalista: Cesarina de Carvalho