AMTL Ho Asosiasaun Médiku Malázia Asina Akordu Ba Haforsa Formasaun no Kapasitasaun Médiku

(AMTL) asina akordu kooperasaun ho Asosiasaun Médiku Malázia hodi haforsa programa formasaun no kapasitasaun ba membru sira, Sábadu 19 Setembru 2026.

Díli, 19 Setembru 2026 (RAFA) — Asosiasaun Médiku Timor-Leste (AMTL) asina akordu kooperasaun ho Asosiasaun Médiku Malázia hodi haforsa programa formasaun no kapasitasaun kontinuada ba membru sira, liuliu iha área saúde klínika, saúde públika no peskiza.

Prezidente AMTL, Herculano Seixas, hateten katak akordu ne’e sei loke oportunidade ba médiku Timor-Leste no Malázia atu halo interkambiu sientífiku, fahe koñesimentu no servisu hamutuk iha dezenvolvimentu programa peskiza iha área saúde.

“Ami asina akordu kooperasaun ho Malázia. Kooperasaun ne’e haree ba oinsá AMTL bele aproveita kolaborasaun ho Asosiasaun Médiku Malázia atu reforsa programa formasaun no kapasitasaun kontinuada ba membru sira, tantu iha área klínika, saúde públika no mós peskiza,” hatete Herculano Seixas iha Lahane, Sábadu-ne’e.

Nia hateten katak área tolu ne’e mak sai nu’udar prioridade iha kooperasaun entre AMTL no Asosiasaun Médiku Malázia, inklui oportunidade atu hasa’e kapasidade profisionál médiku sira no dezenvolve peskiza iha área saúde.

Nia mós esplika katak iha nasaun sira iha rejiaun, kuaze hotu iha ona orden ka orgaun médiku ne’ebé iha papél atu regula prátika profisionál médiku sira.

Tuir nia, kompeténsia orden médiku sira nian inklui prosesu rejistu profisionál, lisensa prátika, medida disiplinár, definisaun padraun prátika klínika, kodigu étika profisionál, no advokasia ba formasaun no kapasitasaun kontinuada ba médiku sira iha Timor-Leste ne’e importante tebes.

“Ho ida-ne’e sei kontribui ba kuidadu saúde ho kualidade di’ak. Ida-ne’e importante tebes atu ita bele defende profisaun médiku hodi hala’o sira-nia ezersísiu tuir padraun ne’ebé iha, no mós defende kualidade asisténsia médika ba ita-nia sidadaun sira,” tenik nia.

Iha fatin hanesan, Vise-Ministru Operasionalizasaun Ospitál, Flávio Brandão, kongratula AMTL ba inisiativa hodi asina akordu ho Asosiasaun Médiku Malázia, ne’ebé sei fó apoiu ba dezenvolvimentu área saúde klínika, saúde públika no peskiza.

Nia hateten katak AMTL iha papél importante hanesan ajente ba mudansa no transformasaun iha setór saúde, liuliu liuhusi haforsa profisionalizmu médiku sira. No konsidera katak médiku ne’ebé iha koñesimentu, kapasidade no profisionalizmu sei hala’o kna’ar no ajuda povu atu hetan atendementu saúde ho kualidade.

“Ita-nia médiku barak ba tuir formasaun iha nasaun oin-oin, mai ho kultura oin-oin no karakter oin-oin, tanba ne’e akordu ida-ne’e oinsá atu kapasita liután ita-nia médiku sira iha Timor-Leste. Tanba ne’e ita kongratula ba inisiativa sira-nia rasik hodi halo parseiru ho mediku sira husi nasaun seluk oinsá atu hadi’a liután ita-nia setór saúde iha Timor-Leste.” dehan Flávio.

Vise-Ministru subliña katak Timor-Leste presiza iha plataforma no padraun komún iha prátika médika, atu asegura katak aposta iha sistema saúde la’ós de’it kona-ba hetan asisténsia saúde, maibé mós asegura kualidade asisténsia ne’ebé aas ba sidadaun sira.

Jornalista: Cesarina de Carvalho