Ouvir RAFA Ritmo, Voz e Coração de Timor
Díli, 05 Novembru 2026 (RAFA)- Diretór Ezekutivu Asia Justice And Rigths (AJAR), José Luís de Oliveira, manifesta falta konfiansa no duvida ba Fernando de Carvalho ne’ebé foin eleitu nu’udar Vise Prezidente Konsellu Superiór Majeslatura Judisiál (CSMJ), tanba durante nia mandatu nu’udar membru konsellu, la hatudu pozisaun kontra desizaun arbitrária ne’ebé Afonso Carmona foti.
José Luís de Oliveira ba RAFA iha nia knaar fatin iha Díli, Kinta-ne’e hatete katak, Fernando de Carvalho tenke hatudu rezultadu servisu no integridade, la’ós de’it simu kargu foun.
“Se Fernando de Carvalho iha integridade, durante Afonso Carmona halo asaun arbitrária, nia tenke ko’alia. Maibé nia nonok de’it. Ne’e mak halo ha’u ladún iha konfiansa katak nia bele halo mudansa,” hatete Diretór Ezekutivu AJAR, José Luís de Oliveira.

Iha sotin seluk, Diretór Asosiasaun HAK, Feliciano da Costa Araújo, afirma katak sosiedade sivíl sei hein atu haree Fernando de Carvalho nia kapasidade, kompromisu no responsabilidade iha lideransa foun CSMJ.
Feliciano konsidera katak eleisaun lideransa foun bele sai oportunidade di’ak, maibé presiza prova liuhusi rezultadu servisu.
“Atu dehan katak ida ne’e di’ak, ita tenke haree uluk oinsá ninia implementasaun, kompromisu no responsabilidade ba instituisaun. Ami-nia espetativa mak oinsá nia bele kontribui ho vontade no kapasidade ba setór justisa,” hatete Feliciano da Costa Araújo.
Fó hanoin fali katak, iha loron 04 Novembru 2026, Konsellu Superiór Majistratura Judisiál (CSMJ), nomea vogál Fernando de Carvalho bá Vise Prezidente Konsellu nian hodi troka Francisco Nicolau Li ne’ebé antes ne’e hala ‘o knar hanesan vise prezidente.
Jornalista: Cristina Ximenes
Written by: RafaFM
AJAR Duvida Integridade Fernando de Carvalho iha CSMJ
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt