Aero Dili Lansa Voo Díli-Darwin Ho Alvu Hametin Parseria no Haburas Ekonomia

Serimonia lansametu voo Aero Dili ba Darwin-Austrália, Domingu 21 Juñu 2026.

Díli, 21 Juñu 2026 (RAFA.TL),—Aviaun komersiál Aero Dili ho bandeira RDTL, Domingu (21/06/2026), lansa ofisiál voo dahuluk ba Darwin-Austrália.

Durante ne’e, Aero Dili ho nia armada rua; A320 ho A319 halo ona operasaun hodi vasilita viajen aéreu nian husi Díli-Denpasar, Díli-Xiamen (Xina), Díli-Singapura no Díli-Kuala Lumpur. Iha voo doméstika nian, Aero Dili halo voo Díli-Oé-Cusse.

Prezidente Repúblika (PR), Jose Ramos-Horta, iha nia  diskursu lansamentu voo Aero Dili nian ba Darwin-Austrália, hateten rota foun Aero Dili nian ne’e nu’udár pasu importante ba konetividade aéreu entre Timor-Leste ho nasaun viziñu Austrália.

Xefe Estadu aprésia ba ezisténsia Aero Dili nu’udár kompañia Timoroan  ne’ebé lori bandeira RDTL  semo iha kalohan leten ba mundu. Tanba ne’e, inisiu kedas Prezidente Repúblika foti pozisaun fó nia apoiu tomak ba inisiativa ne’ebé Aero Dili halo.

Xefe Estadu Timor-Leste konsidera rota Dili-Darwin no Darwin-Díli sai ponte importante atu fasilita movimentu ema nian h onia objetivu prinsipál, mak hametin parseiria, haburas vida ekonomia no harame turista iha Timor-Leste.

Ramos-Horta kontinua enkoraza Aero Dili atu fó nia prestasaun servisu ho di’ak hodi aumenta rote barak liután, liuliu ruta sira ba nasaun Estadu membru ASEAN sira.

Rota Aero Dili nian husi Dili-Darwin sei fasilita liután viajen ba sidadaun Timor-Leste, estudante, negosiante, no turista sira entre nasaun rua.

Prezidente Repúblika agradese ba autoridade Norte Austrália nian ne’ebé simu voo  Aero Timoroan nian atu halo operasaun iha Austrália nu’udar nasaun estratéjika ba Timor-Leste.

Ministru Transporte no Komunikasaun, Miguel Marques Gonçalves Manetelu ne’ebé reprezenta Governu iha lansamentu voo Aero Dili nian ba Darwin iha Aeroportu Internasionál Prezidente Licolau Lobato, hato’o parabéns ba Aero Dili ba vizaun, kompromisu no determinasaun Aero Dili nian hodi lansa servisu aéreu internasionál.

Ministru Miguel Marques Gonçalves Manetelu haktuir ida-ne’e maka marku signifikativu ida iha Timor-Leste nia viajen ba konetividade rejionál no globál ne’ebé boot liu no  reflete Estadu Timor-Leste nia kompromisu koletivu atu hakbesik povu Timor-Leste, fasilita komérsiu no investimentu, promove turizmu no kria oportunidade foun ba kresimentu ekonómiku ne’ebé sustentável.

Miguel Marques Gonçalves Manetelu hateten, liuhosi lansamentu voo Aero Dili ba Darwin ne’e hametin liután Timor-leste nia konetividade ne’ebé sai nafatin hanesan prioridade prinsipál ida husi Governu, liuhosi Ministériu Transporte no Komunikasaun (MTK) nia kompromisu u atu dezenvolve sistema transporte ida ne’ebé modernu, seguru, konfiável no efisiente hodi promove dezenvolvimentu nasionál no hametin Timor-Leste nia integrasaun iha ekonomia rejionál no globál.

Lori governu nia naran Ministru Miguel Marques Manetelu hato’o apresiasaun sinseru mós ba Governu Austrália no parseiru sira hotu nia kooperasaun no apoiu kontribui ona rota foun Aero Dili nian ba Darwin.

Iha biban ne’e, Diretór Ezekutivu Aero Dili, Lourenço de Oliveira, hato’o agradesimentu ida kle’an tebes ba entidade hotu nia suporta hodi Aero Dili bele aumenta tan voo Dili-Darwin no ba fatin hotu-hotu.

Tuir planu, Aero Dili nia voo foun ne’e sei hala’o semana ida dala-rua, entre Domingu no Tersa, husi oras tuku 8:00 dadér oras Timor-Leste (OTL).

Embaixadora Austrália iha Timor-Leste, Caitlin Wilson, ne’ebé partisipa mós iha serimonia lansamentu voo Aero Dili nian ba Darwin ne’e hato’o  nia apresiasaun boot ba Diretór Ezekutivu  Aero Dili, Lourenço de Oliveira  no afirma tan katak Austrália  konsidera voo aviaun Timoroan nian da-huluk ba Austrália ne’e importante loos.

Embaixadora Caitlin Wilson  hateten Austrália nu’udar parseiru belun ne’ebé la dook husi Timor-Leste, konsidera aumenta konetividade ida-ne’e kontinua  promove negósiu entre povu Timor-Leste ho Austrália.

Jornalista: João Carlos/Editór: Vito Salvadór