Advogadu ba Xinés Na’in-18 Konsidera Intervensaun Polísia La Tuir Prosedimentu

Polísia lori sidadaun Xina na'in-18 ba halo identifikasaun iha Kuartel Jerál PNTL, Sesta-kalan (20/02/2026). Imajen/Rafa.tl

DILI, RAFA.tl–Advogadu privadu Octavio Cardoso, ne’ebé fó asisténsia legal ba sidadaun Xina na’in-18 konsidera atuasaun Polísia Nasionál Timor-Leste (PNTL) la tuir prosedimentu Lei.

Notísia Relevante: PNTL Asegura Xinés Na’in-18 iha Fomento Tanba Deskonfia Komete Jogu Ilísitu

Iha Sesta-kalan, 20 fulan-Fevereiru 2026, ekipa konjunta husi PNTL ho Servisu Migrasaun, halo buska no apreensaun ba rezidénsia privadu ida iha área Fomento, Suku Comoro, Postu Administrativu Dom Aleixo, Munisípiu Díli, no halo detensaun mós ba sidadaun Xina na’in-18 tanba deskonfia hala’o atividade jogu ilísitu ka jogu online scamming.

“Ha’u hanesan advogadu ba prosesu ne’e,  liuliu haré ba iha parte prosesuál, ha’u  dúvida ba maneira atuasaun husi ekipa konjunta PNTL  ne’ebé la aprezenta mandadu buska no apreensaun husi Tribunál,” Advogadu privadu, Octavio Cardoso  hateten ba jornalista sira liu husi konferénsia imprensa  iha Fomento, Sábadu (21/02/2026).

Octavio Cardoso afirma atuasaun polísia tenke kumprimenta ba Lei no respeita direitus umanus no prinsípiu sira prezunsaun insénsu.

“Polísia sira mai ho rajaun katak ne’e hanesan flagante de litu, ita bo’ot sira akompaña rasik katak sasan sira ne’ebé mak halo apreensaun atuál, ida ne’e laiha evidénsia ne’ebé balun maka iha indikasaun katak atividade ne’e la’o hela ka halo hela instalasaun ba iha indisu krime ne’ebé  maka Polísia sira hateten. Mas, tuir ha’u nia haré laiha indisiu ne’ebé maka bele halo Polísia atu ultrapasa ka tama iha rezidénsia tanba hanesan uma-nain sira mós la satisfas,”  Octavio Cardoso hateten.

Tuir advogadu, família no parte envolvida sente preokupa kona-bá oinsa prosesu ne’e la’o, no husu ba autoridade kompetente atu halo avaliasaun klaru hodi garante transparénsia no justisa.

“Polísia lori Estadu Timor-Leste nia naran halo atuasaun ne’e tenke hatudu ita nia profesionalizmu servisu, atraves kodigu ne’ebé mak regula, tanba ita hotu  ne’ebé  hala’o ita nia servisu hanesan profisaun ida iha ona ninia matadalan atu ita  kumpri, ne’e ha’u nia dúvidas ne’ebé sai mós sujestaun ba ha’u nia kolega Polísia sira  mai halo atausaun ne’e,” Octavio Cardoso tenik.

Sidadaun Xina na’in-18 ne’e tama Timor-Leste ho vistu turista no to’o agora seidauk hatene sira-nia atividade tanba sira foin tama mai iha loron hanesan, ezemplu balun tama mai iha loron 09 no balun fali tama iha loron 11 no balun tama mai iha loron 12 fulan-Fevereiru ne’e.

Iha buska ne’e, Polísia halo apreensaun ba evidénsia sira maka hanesan ekipamentu safety Box (brankas tau osan 1), modem wireless  ida (1),  Komputador PC hamutuk 12, meza desktop rua (2), meja kik tolu  (3), kama andár 10, spring bed 20 ne’ebé tau iha kuartu neen (6) nia laran.

Reportajen Ekipa Rafa.tl