Noticias

Lere Anan Timur Rekoñese Nia Oan Sai Arguidu Ba Kazu Komérisu Ilísitu

todayNovember 21, 2026 14

Background
share close

Díli, 21 Novembru 2026 (RAFA) – Tenente-Jenerál (Reformadu), Lere Anan Timur, rekoñese nia oan sai arguidu  ba kazu komérsiu ilísitu ne’ebé hatama sigaru marka Marlboro karton 149. Maibé, Lere hateten, lei iha atu tesi-lia no ema hotu iha lei nia okos.

Tenente-Jenerál (Reformadu), Lere Anan Timur, hateten oan mane ne’e lakon iha tempu Indonézia desde idade fulan neen, tinan 30 mak hetan fila-fali bainhira iha ona fen no oan, tanba ne’e rekoñese katak dalaruma laiha komunikasaun di’ak tanba ne’e buat hotu lei mk boot liu.

“Ha’u nia sala mak há’u la hanorin nia durante tinan 20-30 resin, há’u nia sala mak há’u bá hetan nia, loloos há’u labele hetan nia para labele mai konfuzaun há’u ka lae, mais ita nu’udar Timor-oan ita iha kultura ita iha tradisaun nu’udar Timor-oan, há’u nia ran, há’u tenke ba buka duni mais buka la hetan pasensia, mais hetan ha’u lori mai nu’udar ha’u nia oan nafatin bele naokten to’o ne’ebé mós há’u labele dehan katak ne’e la’ós há’u nia oan,” Tenente-Jenerál (Reformadu) Lere Anan Timur hateten hodi responde jornalista sira iha Institutu Superior Dom Bosco, Comoro, Sábadu-ne’e.

Lere Anan Timur afirma tan, kazu saida de’it Lei ba ema hotu-hotu, la’ós ba ema ki’ik de’it, ema hotu-hotu iha Leí nia okos, nune’e prosesa tuir Leí ne’ebé vigór.

“Mais mak ne’e Leí ba ema hotu-hotu kuandu nia sai husi detensaun há’u dehan dala ida tan o ba para iha Becora, Lei ne’e la’ós ba ema ki’ik de’it, Leí ne’e ba ema hotu-hotu, boot nia oan ka ki’ik nia oan, ema-boot ka kiik hotu-hotu Lei nia okos, Leí mak ita nia leten,” Lare afirma tan.

Tenente-Jenerál (Reformadu) ne’e haktuir nia oan tinan-10 iha Timor ona, maibé seidauk muda karakter Indonézia.

“Boby apezar tinan 10 iha Timor, mós nia karater Indonéziu ne’e la muda ida, nia ne’e ema lahatene nia ne’e ema Indonéziu nia oan la’ós há’u nia oan, mais tanba ran ne’e mak há’u nia oan ne’e, maibé karater ne’e la’ós há’u, hanesan há’u dehan katak karater agora ne’e oin seluk, há’u nia karater respeita ema, hadomi ema, mais uluk há’u nia karater ba oho ema sé nia agora oho ema karik nia lori nia aman nia karater oho-dor ema ne’e mais ilegal ne’e há’u uluk nunka halo illegal,” Lare hateten tan.

Nia rekoñese nafatin hanesan oan, tanba oan boot iha ema nia rai, ema seluk mak eduka, nune’e nia kometa atividade merkadoria ilísitu ne’e.

Tribunál Aplika  Aprezentasaun Periódika ba Arguidu Sira  

Hanesan RAFA fó sai ona, katak  Tribunál Judisiál Primeira Instánsia Díli (TJPID), Sesta 20 Novembru-ne’e, deside aplika medida koasaun Aprezenta Periódika (AP) bá arguidu na’in-haat iha kazu komersiu ilísitiu ne’ebé evolve mós líder balu nian oan ho membru FALINTIL Forsa Defeza Timor-Leste  (F-FDTL) ida.

Tribunál mós deside fó liberdade sidadaun Malázia ida tanba konsidera detensaun ba arguidu ne’e illegal ka la priénse fraglante delito.

Prokuradór Rogerio Viegas Vicente, ne’ebé reprezenta Ministériu Públiku akuza arguidu sira Krime kontra bandu, tanba alegadamente hatama sigru ilegál ho marka Marlboro hamutuk karton 149.

Jornalista: Juvinal Cabral

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!