Noticias

Ministériu Edukasaun Espande Tan Ensinu Ekivalensia Ba Munisípiu Lima

todayNovember 21, 2026 40

Background
share close

Díli, 21 Novembru 2026 (RAFA)- Ministériu Edukasaun (ME) espande tan programa nasionál ekivalensia ensinu sekundáriu  ba faze dahuluk ba munisípiu lima, hanesan Aileu, Bobonaru, Baucau, Ermera, Liquiça  no  faze daruak ba Munisípiu Díli.

Diretór Nasionál Ensinu Rekorrente, Alfredo de Araújo, Sesta-ne’e, esplika objetivu prinsipál husi programa ekivalénsia ida-ne’e atu fó oportunidade daruak ba joven no adultu sira neʼebé uluk lakon oportunidade atu konklui sira-nia estudu ka abandona eskola tanba sirkunstánsia moris no kompleksidade oioin.

Nia hatutan, programa ne’e nakloke ba sidadaun hotu nune’e bele alkansa sira-nia objetivu no muda koñesimentu, liuliu iha área siénsia nian.

“Klaru ita sei espande tan ba iha munisípiu sira seluk, ita labele halo buat hotu dala ida iha tinan ida. Maibé, ita halo fazeadamente, tanba tinan ida-ne’e ba munisípiu lima ona no ba tinan sira tuir mai sei espande ba tan munisípiu seluk,” Alfredo de Araújo hateten iha INFORDEPE.

Nia informa katak programa ida-ne’e ninia prosesu aprendizajen sei hahú iha tinan 2027 no rezistu sei hahú iha Dezembru. Tanba ne’e ME mós fó ona formasaun ba profesór ekivalensia sira husi Munisípiu ne’en hamutuk na’in-39 durante semana ida ne’ebé hahú husi loron 16 Novembru to’o loron 20 semana ne’e.

Nia dehan, objetivu prinsipál husi formasaun ida-ne’e prepara profesór ne’ebé hanorin iha ensinu sekundariu ne’e atu hanorin kontinua ba estudante ekivalensia ne’ebé iha.

Matéria ba ensinu ekivalensia ba faze ida disiplina neen, mak língua Inglés, Portugés, Tetum, Melaiu, Sidadania no Teknolojia informátika komputadór.

Ba faze daruak ne’e disiplina sia, hanesan Istória, Jeografia, Matematika, Fízika, Temas Literaturas, Ekonomia kuantitativa no seluk tan.

Juvêncio Marques Correia.

Iha fatin hanesan, profesór Juvêncio Marques Correia, informa katak sira orgulu tanba iha programa ida-ne’e bele eleva no ajuda joven adultu sira ne’ebé antes ne’e enfrenta problema ekonomia, no problema lubun ne’ebé halo sira la konsege finaliza sira-nia estudu.

Nia mos relata investimentu iha ensinu rekorrente ne’e hanesan mós investimentu direta iha kapitál umanu no dezenvolvimentu ekonómiku Timor-Leste nian.

Nia esplika, Edukasaun nafatin nakloke ba joven no adultu sira no laiha limitasaun ne’ebé hetan ekivalénsia ida-ne’e, sira sei sai fali forsa servisu neʼebé kualifikadu, kriativu, inovativu, no prontu atu kontribui fali ba progresu no dezenvolvimentu iha rai laran.

Nia  husu ba joven adultu sira ne’ebé uluk la remata estudu bele hakbesik an ba eskola liuliu ensinu rekorrente refere atu bele finaliza tiha ensinu sekundaria nune’e bele kontinua ba iha ensinu superior.

Jornalista: Cesarina de Carvalho

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!