PM Xanana To’o iha Manila Simu ho Onra no Parada Militár

PM Xanana to'o iha Manila-Filipina simu ho onra no parada militár, Sábadu 14 Novembru 2026.

Manila, 14 Novembru 2026 (RAFA)– Primeiru-Ministru (PM), Kay Rala Xanana Gusmão ho delegasaun, Sábadu-ne’e, to’o ona iha Ninoy Aquino International Airport (NAIA), Terminal 3, Manila-Filipinas, hodi partisipa iha 49º Simeira ASEAN no Enkontru Relasionadu (49th ASEAN Summit and Related Summits).

Prezensa PM Xanana nian simu direta hosi Imelda Calixto-Rubiano, Mayor Pasay City ka Prezidente munisípiu Pasay City, akompaña ho onra no parada militár.

Prezensa PM Xanana iha Manila atu reprezenta Timor-Leste iha enkontru rejionál ne’ebé sei hala’o hosi  loron 11 to’o loron 18 fulan-Novembru 2026, ho partisipasaun hosi líder sira Estadu-Membru ASEAN, parseiru diálogu no organizasaun internasionál.

Iha komunikadu ofisiál ne’ebé RAFA asesa revela katak partisipasaun Timor-Leste iha enkontru ne’e sei fó oportunidade bá PM Xanana atu partisipa iha diskusaun no enkontru iha nível lideransa, hodi hametin kooperasaun rejionál, promove interese nasionál no kontribui bá esforsu hamutuk iha ASEAN.

Hafoin serimónia simu iha aeroportu, PM Xanana ho delegasaun kontinua viajen bá Manila Hotel, fatin ne’ebé sei sai baze bá atividade durante vizita iha Manila.

PM Xanana mós kontinua partisipa iha enkontru preparatóriu iha nível funsionáriu seniór no ministru sira, molok hala’o enkontru iha nível Xefe Estadu no Xefe Governu nian iha 49º Simeira ASEAN no Enkontru Relasionadu.

Jornalista: Zita Menezes