Estadu Membru ASEAN Ofisialmente Asina Akordu Kuadru Ekonomia Dijitál ASEAN

Estadu membru ASEAN sira ofisialmente asina akordu kuadru ekonomia dijitál ASEAN iha Manila-Filipina, Sábadu 14 Novembru 2026.

Manila, 14 Novembru 2026, (RAFA)–Estadu membru ASEAN sira, Sábadu-ne’e,  iha Manila-Filipina, ofisialmente asina akordu kuadru ekonomia dijitál ASEAN (ASEAN Digital Economy Framework Agreement–DEFA) nu’udar parte husi enkontru ASEAN iha tinan 2026.

Timor-Leste  reprezenta husi Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, partisipa no asina akordu ne’e nu’udar reprezentante ofisiál Governu Timor-Leste.

Serimónia asinatura ne’e hala’o iha enkuadramentu 49.ª Simeira ASEAN no Simeira Relasionada sira, ne’ebé reúne líder sira no reprezentante Governu husi nasaun membru ASEAN, atu hametin kooperasaun rejionál no promove integrasaun ekonómika entre nasaun sira.

Asinatura akordu DEFA atu hametin integrasaun ekonómika rejionál, liuliu iha dezenvolvimentu ekonomia dijitál, fasilitasaun komérsiu dijitál, pagamentu eletróniku, protesaun dadus, seguransa síber no inovasaun teknolojia.

Akordu ne’e iha objetivu atu hametin kooperasaun entre Estadu membru ASEAN, armoniza regra no padraun dijitál, hodi kria ambiente ekonómiku dijitál ne’ebé seguru, inkluzivu no kompetitivu, no mós fasilita emprezáriu sira, liuliu mikro, ki’ik no média empreza (UMKM), atu asesu ba merkadu rejionál no oportunidade negósiu foun.

DEFA mak akordu rejionál ne’ebé abranje komérsiu dijitál, pagamentu eletróniku, identidade dijitál, jestaun dadus, seguransa síber no intelijénsia artifisiál.

Jornalista: Remigia Lacatelli