Justisa no Krime

Tribunál Rekursu Suspende Tranferénsia Juís Na’in-haat Ne’ebé KSMJ Deside

todayNovember 11, 2026 44 1

Background
share close

Díli, 11 Novembru 2026 (RAFA) – Tribunál Rekursu suspende efeitu jurídiku husi deliberasaun Konsellu Superior Magistratura Judisiál (KSMJ) ne’ebé determina transferénsia juíz na’in-háat ba tribunál Baucau, Suai no Oé-Cusse. Tribunál deside katak juíz sira-ne’e tenke kontinua hala’o sira-nia knaar jurisdisionál iha tribunál orijen, durante períodu suspensaun.

Desizaun ne’e, ne’ebé iha loron 11 fulan-Novembru 2026 no hetan asesu husi RAFA, simu pedidu medida kautelár ne’ebé juíz sira aprezenta, no konsidera pedidu ne’e fundamentadu.

Juíz na’in-háat ne’ebé hetan benefísiu husi desizaun ne’e mak António Fonseca, Ana Paula, José Gonsalves no Francisco Cabral. Sira mak alvu husi deliberasaun KSMJ nian, iha loron  21 fulan-Agostu 2026.

Akordaun ne’e hetan asinatura husi kolétivu juíz na’in-tolu, kompostu husi Duarte Tílman Soares, nu’udar juíz relator; Deolindo dos Santos, nu’udar juíz adjuntu dahuluk; no Edite Palmira dos Reis, nu’udar juíz adjuntu daruak.

Polémika kona-bá transferénsia ne’e mosu depoisde KSMJ foti deliberasaun atu transfere juíz na’in-sia ba tribunál sira iha Díli, Suai, Baucau no Oé-Cusse.

Fonte sira husi área judisiál hatete ba RAFA katak prosesu transferénsia ne’e la tuir prosedimentu movimentu judisiál ordináriu, ne’ebé normalmente hahú ho pedidu husi juíz sira no konsidera kritériu antiguidade, ka tempu servisu iha kategoria respetiva. Prosedimentu hanesan ne’e mós aplika iha movimentu judisiál ne’ebé hala’o iha Jullu 2024.

Tuir fonte sira-ne’e, KSMJ mós la aprezenta fundamentasaun jurídika kona-bá aplikasaun esepsaun sira ne’ebé lei permite atu dispensa konsentimentu husi majistradu sira, kritériu ordenasaun tuir antiguidade no prazu mínimu tinan tolu ba juíz ida atu kontinua iha fatin servisu ne’ebé atribui ba nia. Regras hirak-ne’e hakerek ona iha Lei N.º 5/2022.

Entre juíz na’in-sia ne’ebé hetan transferénsia, inklui juíz na’in-rua ho antiguidade aas liu iha sira-nia kategoria, mak António José Fonseca Monteiro de Jesus, ne’ebé transfere husi Díli ba Suai, no Ana Paula Fonseca Monteiro de Jesus, ne’ebé transfere husi Díli ba Oé-Cusse.

Fonte sira-ne’e mós alerta katak transferénsia ne’e iha impaktu direta ba prosesu judisiál sira ne’ebé antes ne’e distribui ona ba juíz sira liuhusi sistema distribuisaun aleatória. Ida-ne’e tanba, ho transferénsia ne’e, prosesu hirak ne’e sai automatikamente husi responsabilidade juíz sira ne’ebé simu ona distribuisaun.

Antes ne’e, iha 23 Setembru 2026, Ana Paula Fonseca Monteiro de Jesus aprezenta keixa formál ba Provedoria Direitus Umanus no Justisa, Konsellu Superior Magistratura Judisiál no Konsellu Superior Ministériu Públiku.

Jornalista: António Sampaio

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!