Ouvir RAFA Ritmo, Voz e Coração de Timor
Díli, 07 Novembru 2026 (RAFA)–Tribunál Judisiál Primeira Instánsia Díli (TJPID), Sesta-ne’e, hala’o ezekusaun ba rai ne’ebé okupadu husi Salvador Guterres, nu’udar reu, atu fó fila direitu posse bá autór Manuel Sarmento iha Becussi.
Mandatáriu legál bá autor, Defensór Públiku Sérgio Dias Quintas, informa bá jornalista sira katak prosesu ne’e iha ona desizaun Tribunál dezde tinan 2022 no tranzita em-julgadu iha tinan 2023.
Iha tinan hanesan, parte autór submete ona pedidu bá asaun ezekutiva, maibé ezekusaun ne’e Tribunál la konsege hala’o iha tempu ne’ebá.
“Prosesu ida-ne’e la’o kleur tiha ona, tinan lima tiha ona, desizaun tranjitada tiha ona katak desizaun ne’e, depois maka nu’udar Defensór Públiku ne’ebé maka fó asintensia téknika gratuita ba autór, autór manán, entaun ami hato’o fali pedidu ida bá Tribunál, pedidu ne’e ho naran asaun titúlu ezekutivu, tanba ne’e maka ezekutadu reu la kumpri ami hatama para Tribunál bá ezekuta”, Sérgio Quitas hateten.
Nia afirma prosesu ezekusaun ne’e hasoru impedimentu durante atuál Prirmeiru Kay Rala Xanana Gusmão iha tempu ne’ebá no foin agora mak Tribunál konsege hala’o ezekusaun bá desizaun judisiál refere.
Sérgio Quintas husu parte reu atu koopera ho autoridade judisiál, hodi garante katak prosesu ezekusaun ne’e lao ho di’ak no autor bele asesu fali ba ninia direitu posse ba rai ho medida metru kuadradu 1.330.
Sérgio Quintas esplika katak Manuel Sarmento sosa rai refere hosi sidadaun ida. Maibé, tanba iha momentu ne’ebá Manuel Sarmento la hela iha rai ne’e, nia entrega rai refere ba nia alin, Salvador Guterres, atu tau matan, maibé, bainhira nia maun hakarak simu fila fali rai ne’e, Salvador Guterres la entrega.
Nia fundamenta, tanba ne’e prosesu ne’e lori bá iha Tribunál, no Tribunál deside ona katak autór mak iha direitu bá rai refere tanba rai-ne’e hanesan direitu privadu tuir kontratu kompra venda.
Tribunál mós haree katak kompova duni, tanba ne’e mak rai-ne’e tenke fó fila fali bá na’in.
Durante ezekusaun Tribunál parte reu koopera ho autoridade judisiál hodi hasai no sobu odamatan, janela, kalen no sasán sira seluk ne’ebé iha rai refere, atu nune’e bele kumpri desizaun Tribunál nian.
Jornalista: Marcelino Tomae
Written by: RafaFM
Tribunál Díli Entrega Hikas Rai iha Becussi Ba Manuel Sarmento
todayNovember 20, 2026 4 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt