Timor-Leste ho Vietname Estabelese Ekipa Konjunta Identifika Área Potensiál Ba Dezenvolvimentu Kooperasaun

Ministra Edukasaun Dulce de Jesus ho Embaixadór Vietname mai Timor-Leste, Pham Binh Dam.

Díli, 5 Novembru 2026 (RAFA)– Governu Timor-Leste, liu husi Ministériu Edukasaun ho Embaixada Vietname iha Timor-Leste, estabelese ekipa konjunta ida atu esplora no identifika área potensiál sira ba dezenvolvimentu kooperasaun iha edukasionál.

Ministra Edukasaun, Dulce de Jesus Soares, hatete estabelesimentu ekipa konjunta ne’e bazeia ba akordu kooperasaun ne’ebé Ministériu Edukasaun Timor-Leste no Ministériu Edukasaun Vietname inisia iha ámbitu Timor-Leste sai membru plenu ASEAN.

Nia esplika katak ekipa konjunta ne’e sei servisu hamutuk atu esplora no avalia posibilidade kooperasaun iha área edukasaun.

Ministra Edukasaun ne’e hatutan iha enkontru ho Embaixadór Vietname, parte rua diskute ona possibilidade kooperasaun iha área dijitalizasaun edukasaun, inklui planu Ministériu Edukasaun atu hahú hanorin língua Inglés iha Ensinu Báziku ba klase 5⁰ no 6⁰ ano.

Tuir nia, to’o agora matéria Inglés hahú hanorin ba estudante sira iha klase 7, maibé Ministériu Edukasaun iha planu atu hatama matéria Inglés iha kuríkulu Ensinu Báziku ba klase 5⁰ no 6⁰ ano, atu estudante sira bele hahú aprende língua Inglés sedu liután.

“Embaixadór mós haree katak ida-ne’e importante no bele haree hamutuk no halo pilotajen ida iha eskola ida rua nune’e bele alastra ba eskola sira seluk,” haktuir Ministra Dulce de Jesus, Kinta-ne’e.

Governante ne’e mós relata kona-bá introdusaun matéria Inglés iha klase 5⁰ no 6⁰ ano sei tama iha kuríkulu. Maibé, planu ne’e sei iha faze preparasaun tanba ida-ne’e sei implementa iha tinan 2027.

Nia mós informa katak implementasaun planu ne’e sei inklui formasaun ba profesór sira no avaliasaun ba rekursu umanu ne’ebé presiza, liuliu atu apoia reforma kuríkulu edukasaun.

Iha fatin hanesan, Embaixadór Vietname mai Timor-Leste, Pham Binh Dam, informa iha oportunidade boot tebes atu dezenvolve no hadi’a kualidade edukasaun iha Timor-Leste, no Vietname prontu atu servisu hamutuk ho Timor-Leste iha área kooperasaun edukasionál.

Nia afirma apoiu Vietname sei orienta tuir nesesidade no prioridade ne’ebé Timor-Leste identifika iha setór edukasaun.

“Ami prontu no ami prontu atu servisu hamutuk ho parseiru dezenvolvimentu sira seluk hodi apoiu Timor-Leste tuir nesesidade ne’ebé Timor-Leste presiza iha área edukasaun,” tenik Pham Binh Dam.

Embaixadór ne’e mós subliña katak Timor-Leste no Vietname iha ona relasaun bilaterál ne’ebé metin, no nasaun rua ne’e sai membru ASEAN, importante atu hametin no kontinua dezenvolve kooperasaun  ba oin iha área edukasaun.

Jornalista: Cesarina de Carvalho