Festivál Fronteira iha Com, PM Xanana Alerta Promove Dame, Diálogu no Kooperasaun

PM Xanana Gusmãoi hamutuk ho komunidade sira halo abertura ba festivál fronteira 2026 iha Suku Com, Munisípiu Lautem, Sesta 23 Outubru 2026.

Lautem, 23 Outubru 2026 (RAFA)- Iha abertura Festivál Fronteira  iha Suku Com, Munisípiu Laútem,  Sesta-ne’e, Primeiru-Ministru (PM), Xanana Gusmão, alerta ba nasaun no komunidade hotu atu kontinua promove dame, diálogu no kooperasaun.

“Maski festivál fronteira ida-ne’e ki’ik, nia iha signifikadu boot tebes tanba bele hato’o mensajen dame ba mundu,” PM Xanana Gusmão hateten  bainhira ofisialmente halo abertura ba festivál fronteira iha Suku Com.

Xefe Governu dehan, mundu ohin loron enfrenta konflitu barak, inklui iha mediu oriente no Ukránia. Tanba ne’e, apela ba nasaun sira atu komprende malu, halo diálogu no moris hamutuk.

“Agora mundu tama duni ba situasaun dezorden foun ida. Ita bele haree konflitu sira ne’ebé akontese iha mundu, ne’ebé barak tebes, Mundu tenke moris hamutuk, tenke komprende malu, tenke koordena malu no tenke halo diálogu atu hametin kooperasaun, la’ós de’it entre nasaun sira, maibé mós entre komunidade sira,” lider karismátiku ne’e hateten.

Iha Festivál Fronteira tinan-ne´e, PM Xanana Gusmão mós simu partisipante internasionál sira husi nasaun viziñu ho boas-vindas no hateten katak sira la mai hanesan turista, maibé mai hanesan maun-alin atu fahe hanoin no hametin dame.

Nia mós hateten katak promove dame la’ós responsabilidade nasaun boot no nasaun riku sira de’it.

Primeiru-Ministru mós defende katak liu husi lei no norma internasionál, nasaun hotu-hotu bele hamutuk harii mundu foun ida ne’ebé bazeia ba dame no justisa.

Xanana Gusmão hato’o apresiasaun ba partisipante sira-nia preparasaun no prontidaun atu mai Timor-Leste, no sente onradu tanba hetan oportunidade atu loke ofisialmente atividade ne’e.

Jornalista: Davilio Valdamir