SEFOPE Garante Laiha Familiarizmu no Partidarizmu iha Vaga Ba Austrália

Komisaun D PN halo enkontru ho SEFOPE, Kinta 22 Outubru 2026.

Díli, 22 Outubru 2026 (RAFA)- Sekretáriu Estadu Formasaun Profisionál no Empregu (SEFOPE), Rogério Araújo Mendonça, konfirma katak laiha familiarizmu no partidarizmu iha prosesu rekrutamentu vaga ba Austrália.

Nia hateten SEFOPE  nia parte servisu ho onestidade no la tau prioridade ba Munisipíu Aileu, família no partidu nian, maibé  joven sira ne’ebé iha kualifikadu duni mak bele ba servisu iha Austrália.

“Ita ko’alia iha rai nia leten, ita sama iha rai nia leten, nasaun ne’e atu serbi, la serbi ba partidu, la serbi ba família, ita-boot sira ne’ebé mak média, ne’ebé mak akompaña hela ida-ne’e, ita-boot sira bele halo entrevista ho ha’u nia familia rasik. Ha’u nia familia hira mak ba servisu ona iha Austrália, ita boot sira bele halo entrevista,” Sekretáriu Estadu Rogério Araújo Mendonça hateten hodi responde jornalista sira iha Parlamentu Nasionál, Kinta-ne’e.

Membru Governu ne´e hatutan, nia parte hamutuk ho ekipa tomak iha SEFOPE servisu ho onestidade no servisu ba interese públiku hodi garante katak oportunidade hotu-hotu ne´ebé iha ba Timor-oan hotu, la’ós ba familia ka partidu ida nian de´it.

“Ha’u serbi ho onestidade, ha’u atu hatete de’it ba ita-boot sira katak ema ne’ebé mak merese nia mak hetan oportunidade, mais atu hatete de’it katak Aileu mak hetan oportunidade,  ita sama iha rai nia leten, ita lalika ona ko’alia, ita serbi tenke serbi ho fuan ho laran. Rai ida-ne’e ukun aan ne’e ema barak rihun ba rihun mak mate, balu lori ran, balu lori ruin no mate, entaun serbi tenke serbi ho fuan ho laran,” nia afirma.

SEFOPE kontinua servisu hamutuk ho Governu Austrália liu husi programa Pacific Labour Mobility no husi tinan 2026 to’o 2028 iha alvu atu haruka traballadór Timor-oan hamutuk rihun sanulu mak sei ba servisu iha Austrália.

Jornalista: Zita Menezes