MF Nota Entidade Públika Balun Gastu Osan La Tuir Nesesidade

aprezentasaun relatóriu ezekusaun Orsamentu Jerál Estadu (OJE) 2026 ba trimestre datoluk iha Salaun Ministériu Finasas, Díli, Kinta 15 Outubru 2026.

Díli, 15 Outubru 2026 (RAFA)  – Ministériu Finansas (MF) nota katak iha ezekusaun orsamentu Estadu tinan 2026 iha trimestre datoluk, kontinua akontese iregularidade tanba entidade públika balun gasta osan la tuir nesesidade no falta poupansa iha utilizasaun osan Estadu nian.

Vise-Ministra Finansa, Rejina de Jesus Sousa, iha aprezentasaun relatóriu, ezekusaun Orsamentu Jerál Estadu (OJE) 2026 ba trimestre datoluk, Kinta ne’e, iha salaun Ministériu Finansas, apela ba entidade públika hotu uza osan Estadu ho responsabilidade no konsiénsia,  liuliu evita gastu ne’ebé la nesesáriu hodi hametin kultura poupansa.

“ Ita observa iregularidade iha ezekusaun orsamentu iha entidade balu, inklui gastu ne’ebé la tuir nesesidade no falta poupansa iha utilizasaun osan Estadu. Se ita gasta tuir ita-nia hakarak, ita-nia jerasaun agora bele goza. Maibé, jerasaun tuir mai sei la goza,” Vise-Ministra Rejina Sousa hateten iha nia intervensaun.

Nia enfatiza katak entidade públika hotu tenke hala’o servisu ho integridade no transparénsia, no evita prátika ne’ebé la tuir regra, inklui uza osan Estadu ba benefísiu pesoál.

Husu Kumpre Planu Sosa Ekipamentu Estadu

Vise-Ministra Finansa mós ko’alia kona-bá utilizasaun no prosesu sosa ekipamentu Estadu, inklui karreta ofisiál, ne’ebé tenke tuir planu no nesesidade instituisaun nian.

Nia esplika katak Ministériu Finansa hametin kontrolu ba prosesu sosa karreta, liuliu ba karreta ho folin aas, atu asegura katak desizaun sosa ekipamentu tuir planu inisiál no kumpre regra ne’ebé vigora.

Nia fó ezemplu kona-baá entidade ida ne’ebé planeia atu sosa karreta  marka Hilux, maibé iha prosesu implementasaun halo alterasaun ba karreta Prado, ne’e bele hamosu diferensa iha gastu kompara ho planu orijinál.

“Tanbasá mak sistema ne’e taka ba gastu kapitál, liuliu sosa karreta? Lei la fó dalan atu taka, maibé tenke iha kontrolu. Iha entidade balu ne’ebé planeia atu sosa Hilux, maibé depois halo alterasaun no sosa Prado. Ida-ne’e ezemplu ida kona-ba oinsá ita sai husi planu inisiál. Se situasaun hanesan ne’e kontinua akontese, la bele”, tenik  Rejina Sousa.

Tuir Vise-Ministra,  entidade públika hotu tenke asegura katak desizaun kona-ba sosa ekipamentu no uza osan Estadu bazeia ba nesesidade instituisionál, planu ne’ebé aprova ona no responsabilidade iha jestaun finanseira.

Nia reiteira katak jestaun orsamentu ne’ebé responsável, transparénsia no kontrolu rigorozu importante atu proteje rekursu públiku no asegura katak osan Estadu uza ba benefísiu povu no dezenvolvimentu nasaun nian, la’ós ba interese pesoál ka gastu ne’ebé la nesesáriu.

Jornalista : Remigia Locatelli