Tais Timor Hahú Faan iha Merkadu Internasionál

PR Ramos-Horta partisipa iha Tais Forum 2026.

Díli, 13  Outubru 2026 (RAFA)- Prezidente Repúblika, José Ramos-Horta iha abertura tais forum 2026, ne’ebé realiza iha Palásiu Prezidensiál, Tersa-ne´e, konfirma katak tais Timor oras ne´e okupa ona fatin iha merkadu internasionál ho marka rasik ne´ebé úniku no diferente tuir tradisaun no kultura Timoroan nia rasik.

Xefe Estadu hato’o parabéns ba Timor Aid, ho instituisaun sira hanesan Nasaun Unidas, UN WOMEN, UNDP, UNICEF, Embaxada Austrália, Nova Zelándia ne’ebé apoiu maka’as projetu tais iha Timor, governu liu husi Minsiteriu Juventude Desportu, Sekretáriu Estadu Arte no Kultura.

“Ita haree tinan sira nia laran ne’e kadavez tais ema iha mundu koñese liután, konsege faan ba merkadu internasionál. Ha’u hanoin instituisaun ne’ebé gasta osan boot liu ho tais Prezidensia Repúblika, prenda fó iha mundu ba Xefe Estadu, Primeiru Ministru, se-se sempre lori tais kualidade ho kaebauk,” hatete Prezidente Repúblika, José Ramos-Horta

Xefe Estadu esplika, Prezidensia Repúblika halo esforsu maka’as atu halo promosaun nasionál no internasionál. No husu ba Sekretáriu Estadu Arte no Kultura tenke tau orsamentu boot ruma too millaun ida nune’e fó insentivu ba soru tais sira, nune’e sosa kabaas no sosa hena.

Iha fatin hanesan, koordenadóra Rezidente ONU, Funmi Balogun hatete, previléjiu hodi vizita Asosiasaun Soru Tais iha munisípiu hotu-hotu, inklui koko soru Tais ho ha’u-nia liman rasik.

“Ksolok mai ha’u bele hamutuk ho ita-boot sira ohin iha edisaun dahaat Fórum Nasionál Tais Timor-Leste nian. Ha’u hakarak hahú hodi hato’o agradese ba Governu Timor-Leste, Fundasaun Timor Aid, Fundasaun Alola, UN Women no Asosiasaun Rede Soru Nain, tanba sira kontinua hatudu kompromisu metin atu mantein Tais nu’udar parte importante husi patrimóniu kulturál Timor-Leste,” dehan Funmi Balogun.

Koordenadóra ne´e hatutan prezervasaun signifika tau matan ba téknika, dezeñu no signifikadu kulturál sira ne’ebé jerasaun ida transmite ba jerasaun tuir mai.

Seremónia abertura tais forum ne’e partisipa husi Prezidente Repúblika, José Ramos Horta, Ministru Juventude Desportu no Arte Kultura, Nelio Isaac Sarmento, Sekretáriu Estadu Arte no Kultura, Jorge Soares Cristóvão, no mós soru na’in husi Munisípiu 13, inklui Rejiaun Administrativu Espesiál Oé-Cusse Ambeno (RAEOA).

Jornalista: Cristina Ximenes