Tabela Saláriu Mínimu Tenke Sukat Ho Rendimentu Fundu Petrolíferu

PM Xanana Gusmão.

Díli, 13 Outubru 2026 (RAFA)- Primeiru-Ministru, Kay Rala Xanana Gusmão, hatete tabela sálariu mínimu tenke sukat ho rendimentu fundu petrolíferu.

Xefe Governu argumenta liután katak hasa’e saláriu minimu ne’e importante, maibé haree  mós taxa, ne’e atu bele finánsia orsamentu para garante sustentabilidade mákina Estadu no dezenvolvimentu ekonomiku.

“Saláriu mínimu ha’u seidauk simu. Komu la hatene fundu petroleu tun, bainhira ita fundu petroleu menus tiha, aumenta saláriu mínimu, mas taxa bele hetan osan ba tau iha orsamentu taxa mai maka’ás ne’e hotu. Uza ida ne’e taxa ita bele hetan osan,” Xanana Gusmão hateten ba Jornalista sira iha Palásiu Prezidensiál, Segunda-ne´e.

Xefe Governu mós rekoñese katak, preokupasaun saláriu minimu ne’e la’ós iha Timor-Leste de’it, maibé  iha Portugál mós traballadór  sira manifesta loro-loron tanba saláriu mínimu tanba  ne’e aumenta di’ak liután.

Antes ne´e, iha loron 09 fulan-Outubro 2026, Prezidente Repúblika, José Ramos-Horta, konsidera katak saláriu mínimu iha Timor-Leste, ne’ebé atualmente US$115 kada fulan la sufisiente atu responde nesesidade bázika povu nian, nune’e nia defende atu aumenta saláriu mínimu pelumenus to’o US$200 kada fulan.

Jornalista: Cristina Ximenes