Deporta Arguidu Scam Call Centre Depende Ba Desizaun Tribunál

Arguidu sira ba kazu scam call centre iha Otél Garden Beach partisipa iha primeira interogatóriu iha TJPID, Sábadu 12 Setembru 2026.

Díli, 07 Outubru 2026 (RAFA)- Ministru Interiór, Francisco da Costa Guterres, hatete katak prosesu deportasaun ba sidadaun estranjeiru sira ne’ebé sai arguidu iha kazu scam call centre no jogu ilísitu iha Timor-Leste depende ba desizaun Tribunál Judisiál Primeira Instánsia Díli.

Governante ne´e esplika Ministériu Interiór kontinua halo koordenasaun ho embaixada sira ne’ebé reprezenta sidadaun estranjeiru hirak ne’e iha Timor-Leste, atu prepara prosesu deportasaun tuir prosedimentu legál no hein desizaun hosi autoridade judisiál.

“Ita hein desizaun Tribunál. Seidauk deporta ema, tanba presiza hein desizaun Tribunál no kumpre prosedimentu legál. Tanba ne’e, ami halo negosiasaun no koordenasaun atu hein prosesu ne’e molok hala’o deportasaun,” hatete Ministériu Interiór Francisco da Costa Guterres hodi responde jornalista sira iha Palásiu Governu, Kuarta-ne’e.

Ministru Interiór esplika,   Polísia Nasionál Timor-Leste, Ministériu Públiku, Polísia Sientífika Investigasaun Kriminál (PCIC) no Servisu Migrasaun (SM) kontinua halo kontrolu no investigasaun ba atividade jogu ilísitu no scam call centre iha Timor-Leste.

Nia afirma  iha sidadaun estranjeiru balun ne’ebé sai ona suspeitu no hetan medida judisiál, maibé depois kontinua envolve an iha atividade scam call centre no jogu ilísitu, ne’ebé presiza investigasaun no asaun rigorozu hosi autoridade kompetente.

Governu liuhosi Ministériu Interiór kontinua servisu hamutuk ho instituisaun seguransa, autoridade judisiál no reprezentante diplomátiku sira atu asegura katak kazu hirak ne’e trata tuir lei, no prosesu deportasaun hala’o tuir prosedimentu ne’ebé aplika.

Jornalista: João Carlos