Kazu Scam Call Centre, MP Husu Tribunál Aplika Medida Prizaun Preventiva Ba Arguidu Na’in-Haat

Arguidu sira ba kazu scam call centre iha Otél Garden Beach partisipa iha primeira interogatóriu iha TJPID, Sábadu 12 Setembru 2026.

Díli, 12 Setembru 2926 (RAFA)- Prokuradór Domingos Goveia Leite  ne’ebé reprezenta Ministériu Públiku (MP) husu ba Juíza prosesu Novela Alberta Pereira, aplika medida koasaun prizaun preventiva ba arguidu sidadaun Taiwan naa’in-haat.

Arguidu sira-ne’e  Polísia Nasionál Timor-Leste liu-husi Diresaun Servisu Investigasaun Kriminál (DSIK) detein hamutuk  arguidu na’in-ualu seluk nu’udar sidadaun Xina iha Otél Garden Beach, Díli iha iha  kalan 09 fulan-Setembru -ne’e .

Bainhira tama iha audénsia julgamentu prirmeiru interogatóriu, Juíza prosesu Novela Alberta Pereira deside hala’o julgamentu dahuluk  bá  arguidu na’in-haat tanba oras detensaun la  hanesan,  no mós  konfirma arguidu sira nia indetidade ho nasaun orijen.

Durante audénsia julgamentu ne’e, Prokuradór Domingos Goveia Leite akuza arguidu na’in-haat ho krime haat hanesan asosiasaun kriminoza, burla informátika esplorasaun jogu ilísitiu ho brankeamentu kapitál

Iha alegasaun  Prokuradór Domingos Goveia Leite solisita ba Juíza prosesu Novela Alberta Pereira  atu aplika prizaun preventiva tanba arguidu sira suspeita iha envolvimentu atividade ilísitu  scam call centre.

Advogadu privadu Sergio Gama Lobo da Silva Junior, Luís Marcelo  ho Agustiho de Jesus ne’ebé fo asistensia legál bá arguidu  sira husu Tribunál atu aplika medida koasaun proibisaun aujénsia, aprezentasaun periódika no médida kausaun  US$2,500 bá kada Arguidu.

Rona tiha alegasaun husi Ministériu Públiku ho defeza sira, Juíza Novela Alberta Pereira deside adia ba Domingu, 13 fulan-Setembru, hale’u tuku 17:00 OTL hodi hatun despaisu bá arguidu sira.

Jornalista: Marcelino Tomae/ Juvinal Cabral dos Santos