MCI Planeia Implementa Sistema Dijitalizasaun Kontrola Kualiadade Produtu Importasaun

Ministru Komérsiu no Industria, Filipus Nino Pereira.

Díli, 26 Agostu 2026 (RAFA)- Ministériu Komérsiu no Indústria (MCI) planeia iha tinan 2027 implementa sistema dijitalizasaun iha setór komérsiu no indústria ho objetivu atu hametin kontrolu ba kualidade produtu importasaun no esportasaun.

Ministru Komérsiu no Indústria, Nino Pereira esplika sistema dijital ne’e sei fasilita prosesu kontrolu kualidade produtu, liuliu ai-han ne’ebé sirkula iha territóriu nasional. Sistema ne’e sei ajuda asegura katak produtu ne’ebé konsumidór sira sosa no konsume seguru no la prejudika saúde.

“Programa prioridade Governu nian ba 2027 integra mós ho ministériu sira seluk nia programa prioridade, ne’ebé ko’alia kona-bá digitalizasaun no konetividade,”  Ministru Komérsiu no Industria, Filipus Nino Pereira informa ba jornalista sira, hafoin Reuniaun Konsellu Ministru iha Palásiu Governu, Kuarta-ne’e.

Iha reuniaun Konsellu Ministru, aprezenta ona planu ne’e hanesan parte husi programa prioridade Governu ba tinan 2027. Tanba, tuir observasaun MCI haré ba produtu lokal no produdu importasaun ne’ebe sekula iha rai laran tenke kualidade.

“Produtu lokal balun, hanesan kafé, masin no jus agora sirkula ona iha merkadu. Ida ne’e hatudu katak Timor-Leste la’ós de’it nasaun ne’ebé depende ba importasaun. Maibé, mos iha produtu ne’ebé ita produz iha rai laran no sirkula iha merkadu nasional,” Ministru Nino Pereira esplika.

Governante ne’e mós afirma atu garante kualidade produtu lokal, prosesu sertifikasaun no teste laboratóriu sei kontinua envolve Institutu Kualidade Timor-Leste (IQTL).

Nia haktuir iha produtu balun ne’ebé presiza halo teste laboratóriu iha nasaun seluk, hodi asegura katak produtu sira la kontamina ho ingrediente ka substánsia seluk ne’ebé bele prejudika saúde konsumidór sira. Enkuantu produtu balun seluk bele halo teste diretamente iha Timor-Leste.

Nia hatutan tuir dadus ne’ebé IQTL publika, besik item 12 produtu nian mak halo ona teste iha rai laran. Nia espera katak ida ne’e mos sai hanesan sasukat no esforsu ne’ebé IX Governu Konstitusionál halo atu asegura seguransa ba konsumidór sira.

Ministru Nino Pereira informa ba  Autoridade Inspesaun no Fiskalizasaun Atividade Ekonomika (AIFAESA, I.P.) mós prepara orsamentu atu bele instala laboratóriu própriu.

Medida ne’e sei aumenta kapasidade nasional atu halo teste no kontrolu kualidade produtu, nune’e bele hametin liután konfiansa konsumidór sira.

Durante ne’e mós MCI fasilita teste ba produtu balu ho gratuita, liuhusi laboratóriu iha nasaun sira seluk, bainhira presiza.

Ho planu sistema digitalizasaun ne’e, MCI hein katak prosesu kontrolu kualidade produtu iha Timor-Leste sei sai efisiente liután, fasilita monitorizasaun no hametin protesaun ba konsumidór sira.

Jornalista: Remigia Locatelli