Timor-Leste ho Cabo Verde Fortalese Kooperasaun Estratéjika

Ministru Negósiu Estranjeiru, Komunidade no Defeza Nasionál Cabo Verde, Manuel Augusto Lima Amante da Rosa, hasoru malu ho Ministru Negósiu Estranjeiru no Kooperasaun Timor-Leste, Bendito dos Santos Freitas, Tersa 18 Agostu 2026.

Díli, 18 Agostu 2026 (RAFA) —  Timor-Leste ho Cabo Verde kontinua fortalese no hametin relasaun bilateral no dezenvolve kooperasaun estratéjika sira.

Iha  sorutumuk Ministru Negósiu Estranjeiru, Komunidade no Defeza Nasionál Cabo Verde, Manuel Augusto Lima Amante da Rosa ho Ministru Negósiu Estranjeiru no Kooperasaun Timor-Leste, Bendito dos Santos Freitas, Tersa ne’e, sai oportunidade atu análize no buka posibilidade sira atu aprofunda tan relasaun Cabo Verde ho Timor-Leste, liuliu iha área sira ne’ebé bele lori benefísiu ba nasaun.

Ministru Negósiu Estranjeiru, Komunidade no Defeza Nasionál Cabo Verde, Manuel Augusto Lima Amante da Rosa lori mós konvite espesiál ba Ministru Bendito dos Santos Freitas atu halo vizita ofisiál ba Cabo Verde. Vizita ne’e, tuir nia, bele hala’o iha semestre daruak tinan 2026 ka iha tinan oin mai, no sei simu ho laran-metin husi Governu no povu Cabo Verde.

Aleinde ne’e, nia lori mós mensajen hosi Primeiru-Ministru Cabo Verde ba povu Timor-Leste, hodi reafirma Cabo Verde nia kompromisu atu sai parseiru no belun ba Timor-Leste.

“Ami sei halo buat hotu atu nune’e kooperasaun entre ami bele sai kooperasaun ne’ebé di’ak, forte no espesiál, no bele dezenvolve tan nasaun rua ne’e,” Manuel Augusto Lima Amante da Rosa hateten.

Nia mós manifesta apresiasaun ba dezenvolvimentu Timor-Leste ne’ebé kontinua la’o, no agradese ba ospitalidade ne’ebé Timor-Leste fó durante nia vizita sira.

Iha área kooperasaun, Cabo Verde no Timor-Leste konkorda atu hametin relasaun iha setor formasaun, edukasaun, justisa no defeza. Kultura mós konsidera hanesan ponte importante atu hametin ligasaun no kompreensaun entre povu rua.

Ministru Manuel Augusto Lima Amante da Rosa informa katak parte rua konkorda ona atu formaliza no hakerek akordu sira ne’ebé diskute ona iha enkontru bilateral, liuliu iha área prioridade sira ne’ebé identifika ona.

Nia hatutan, hafoin nia fila ba Cabo Verde, sei hahú prosesu atu formaliza konvite ofisiál ba vizita Ministru Negósiu Estranjeiru no Kooperasaun Timor-Leste, no prepara akordu kooperasaun estratéjiku entre nasaun rua.

“Prosesu ne’e sei hahú antes tinan ida-ne’e remata, hodi define área sira ne’ebé ami bele dezenvolve kooperasaun,” nia hateten.

Iha biban ne’e, Ministru Negósiu Estranjeiru no Kooperasaun Timor-Leste, Bendito dos Santos Freitas, relata enkontru bilateral ne’e importante atu haré no planeia futuru kooperasaun entre nasaun rua, liuliu iha área sira ne’ebé Timor-Leste presiza.

Nia esplika kona-bá  prioridade kooperasaun inklui edukasaun, ospitalidade, turizmu no formasaun, inklui mós kooperasaun iha área defeza.

“Ne’e enkontru bilaterál ho MNEK  atu haré futuru kooperasaun ne’ebé Timor-Leste presiza, liuliu ba área edukasaun, ospitalidade, turizmu no formasaun sira,” tMinistru Bendito dos Santos Freitas informa.

Ministru Bendito dos Santos Freitas mós konsidera prezensa Ministru Cabo Verde iha Timor-Leste nu’udar oportunidade importante, liuliu iha kontestu realizasaun Reuniaun Konsellu Ministru CPLP ba dala 31 iha Timor-Leste.

Prezensa Ministru sira husi Cabo Verde iha Timor-Leste bele ajuda konsolida liután parseria no relasaun estratéjika entre nasaun rua ne’ebé konsidera malu hanesan país irmaun.

Kooperasaun entre Timor-Leste no Cabo Verde sei kontinua dezenvolve liuhosi mekanizmu bilateral no CPLP, ho objetivu atu hametin ligasaun diplomátika, ekonomia, edukasaun, kultura, defeza no dezenvolvimentu entre nasaun rua.

Jornalista: Cesarina de Carvalho