Kazu Scam Call Centre Santa Kruz ho Bebonuk, MP Prefere Aplika Prizaun Preventiva Ba Arguidu Sira

Arguidu na'in-lima ba kazu scam call centre iha Santa Kruz ho Bebonuk partisipa iha audénsia interogatóriu dahuluk iha TJPID, Sesta 14 Agostu 2026.

Díli, 14 Agostu 2026 (RAFA)– Ministériu Públiku ne’ebé reprezenta husi Prokuradór Domingos Goveia prefere ba Tribunál atu aplika prizaun preventiva ba arguidu na’in-lima (5) ne’ebé enolve iha atividade scam call centre iha Santa Kruz ho Bebonuk.
Iha audénsia julgamentu interogátoriu dahuluk iha Tribunál Judisiál Primeira Instánsia Díli (TJPID), Sesta-ne’e,  Prokuradór Domingos Goveia halo promosaun ba arguidu na’in-lima ho krime haat (4), mak hanesan  explorasaun jogu ilísitu previstu iha artigu 322,  burla informátika  previstu iha artigu 268, no mós assosiasaun kriminoza previstu iha artigu 188  no krime brankeamentu kapitá previstu iha artigu 313 iha Kódigu Penál Timor-Leste.

Prokuradór Domingos Goveia mós fundamenta katak  karik  Tribunál nia intendimentu oin seluk bele aplika medida kausaun US$5,000 ba kada arguidu, prebuisaun aujénsia no aprezentasaun periódidika, kada semana  dala-rua iha Tribunál.

Defeza ne’ebé fasilita asisténsia legal ba arguido sira, advogadu privadu Ismael  A. Lopes  ho Agustino Lopes, intende katak arguidu na’in-lima (5)  ne’e foin tama mai Timor-Leste iha loron 09 fulan-Jullu  2026, no balun iha loron 08 fulan-Agostu 2026. Tanba  ne’, sira solita  ba Tribunál atu aplika medida kausaun ba arguidu na’in-lima ne’e  ho  valór US$2,500 no tuir arguidu sira nia kapasidade.

Rona tiha alegasaun husi Defeza ho Minitériu públiku, Tribunál liuhosi husi Juis Marculino dos Santos Oliveira,  deside bá Sábádu, 15 Agostu-ne’e, hodi lee despaixu bá kazu refere.

Jornalista: Marcelino Tomae