Tribunál Aplika Medida Tolu ho Kausaun US$3,000.00 Ba Arguidu Na’in-Hitu Kazu Scam Call Centre iha Fatuhada

Arguidu sira ba kazu scam call centre iha Fatuhada, Díli.

Díli, 06 Agostu 2026 (RAFA) – Tribunál Judisiál Primeira Instánsia Díli (TJPID), Kinta-ne’e, hatun despaisu ba primeiru interogatóriu judisiá hodi  deside aplika medida koasaun tolu ho kausaun ho montante US$3,000.00 ba arguidu na’in-hitu ne’ebé envolve iha kazu scam call centre iha Fatuhada, Díli.

Juíza estajiária Maria da Silva Pinto ne’ebé hasai despaisu ne’e  determina atu mantein medida Termu Identidade no Rezidénsia (TIR) ne’ebé aplika ona anteriormente, aumenta tan proibisaun auzénsia no kausaun ho montante US$3.000 ba kada arguidu.

Tribunál fó prazu loron-20 ba arguidu sira atu depozita kausaun ne’e hanesan garantia prosesu. Bainhira la kumpre obrigasaun ne’e iha tempu ne’ebé determina, Tribunál bele altera medida koasaun ba Prizaun Preventiva.

Durante audiénsia, Ministériu Públiku, ne’ebé reprezenta husi Prokuradór João Marques, husu ba Tribunál atu aplika medida koasaun haat, mak hanesan Aprezentasaun Periódika, Proibisaun Auzénsia, Kausaun US$3,000.00 ba kada arguidu, no kontinua mantein Termu Identidade no Rezidénsia (TIR).

Advogadu privadu ne’ebé fó asisténsia legál ba arguidu sira husu ba Tribunál atu análize uluk legalidade mandadu detensaun ne’ebé aplika ba arguidu sira.

Defeza mós deklara simu prinsípiu kona-bá kausaun, maibé husu atu montante ne’ebé determina menus husi US$3,000.00 kada arguidu.

Ministériu Públiku  reprezenta husi Prokuradór João Marques, akuza arguidu na’in-hitu ba krime jogu ilísitu, previstu iha artigu 322, asosiasaun kriminoza, artigu 188, brankeamentu kapitál, Artigu 313, no burla informátika iha artigu 268 husi Kódigu Penál Timor-Leste nian.
Jornalista: João Carlos