Tribunál Absolve Membru PCIC Dedi da Silva husi Akuzaun Krime Obstrusaun Autoridade Públika

Tribunál absolve arguidu Dedi da Silva, membru PCIC husi akuzasaun krime Obstrusaun Autoridade Públika, Kinta 30 Jullu 2026.

Díli, 30 Jullu 2026 (RAFA.TL) – Tribunál Judisiál Primeira Instánsia Díli (TJPID), liuhusi leitura akordaun, Kinta-ne’e, absolve arguidu Dedi da Silva, membru Polísia Sientífika Investigasaun Kriminál (PCIC) husi akuzasaun krime Obstrusaun Autoridade Públika.

Iha leitura akordaun, Juíza Ana Paula Fonseca hateten katak Tribunál la hetan prova sufisiente atu aprova akuzasaun ne’ebé Ministériu Públiku imputa hasoru arguidu. Tanba ne’e, Tribunál deside absolve arguidu husi krime refere, no la iha kustu judisiál.

Juiza Ana Paula Fonseca mós klarifika katak mandadu detensaun ne’ebé antes ne’e hasai hasoru arguidu nia objetivu de’it atu asegura nia prezensa iha leitura akordaun, tanba maski notifika ona, arguidu la marka prezensa iha audiénsia sira anteriores.

Nia subliña katak desizaun judisiál ne’e independente no laiha intervensaun polítika ka ligasaun ho dezentendimentu ne’ebé antes ne’e akontese entre membru PCIC ho Polísia Nasionál Timor-Leste  (PNTL) husi Diresaun Servisu Investigasaun Kriminál (DSIK).

Iha alegasaun final, Ministériu Públiku, liuhusi Prokuradór Adérito Tilman  husu ba Tribunál atu absolve arguidu, tanba konsidera katak faktu sira ne’ebé prova iha julgamentu la priense elementu legál sira husi krime Obstrusaun Autoridade Públika.

Prokuradór Adérito Tilman  fundamenta katak deklarasaun arguidu, ofendidu no sasin sira hatudu katak la iha agresaun fízika hasoru ofendidu. Prova sira hatudu de’it katak arguidu tafui kaben ida ba ofendidu no mosu diskusaun entre parte rua, maibé kolega sira konsege separa sira antes akontese baku malu.

Testemuña sira mós deklara katak arguidu la uza pistola atu ameasa ka impede ofendidu hala’o nia servisu.

Parte defeza konkorda ho pozisaun Ministériu Públiku no husu Tribunál atu absolve arguidu.

Durante julgamentu, arguidu Dedi da Silva rejeita akuzasaun balu ne’ebé Ministériu Públiku aprezenta. Nia deklara katak nia lori arma ho autorizasaun legál, no bainhira to’o iha edifísiu PCIC, nia husik arma iha karreta antes tun atu ko’alia ho ofendidu.

Nia rekoñese katak mosu dezentendimentu tanba publikasaun sira ne’ebé ofendidu halo iha Facebook, maibé nega katak nia tuku ka impede ofendidu hala’o nia knaar.

Husi parte seluk, ofendidu deklara katak simu mensajen no telefone husi arguidu antes insidente akontese. Nia rekoñese katak mosu diskusaun no arguidu tafui kaben ida ba nia, maibé la akontese baku malu tanba kolega sira halo intervensaun. Ofendidu mós konfirma katak arguidu la uza arma atu impede nia hala’o servisu.

Tuir akuzasaun Ministériu Públiku, insidente ne’e akontese iha loron 14 Juñu 2024 iha edifísiu PCIC.

Ministériu Públiku akuza arguidu hanesan autór material ba krime Obstrusaun Autoridade Públika, previstu iha artigu 243 husi Kódigu Penál Timor-Leste. Maibé, hafoin apresia produsaun prova hotu, Tribunál deside absolve arguidu tanba la iha prova sufisiente atu suporta akuzasaun refere.

Audiénsia julgamentu ne’e prezide husi juiz  koletiva kompostu husi juiz José Maria, Ersília de Jesus ho Ana Paula Fonseca.

Ministériu Públiku reprezenta husi Prokuradór Adérito Tilman no  arguidu hetan asisténsia legál husi Defensór Públiku Fernando de Carvalho.

Jornalista: João Carlos