Governu Timor-Leste Aprova Memorandu Entedimentu ho Ministériu Defeza Portugal Hodi Promove Atividade Formasaun Ba F-FDTL

Ministru Defeza Timor-Leste, Donaciano da Costa Gomes ho Ministru Defeza Nasionál Portugal, Nuno Melo, asina Programa Enkuadramentu Kooperasaun iha Domíniu Defeza no Memorandu Entendimentu Misaun Portugál ba hasa’e kapasidade iha Timor-Leste, reforsa parseria estratéjia entre nasaun rua ne’e Lisboa, Portugál Kinta 23 Jullu 2026. Imajen/M-GMD

Díli, 29 Jullu  2026 (RAFA.TL)- Governu Timor-Leste liuhosu desizaun Konsellu Ministru, Kuarta-ne’e, aprova proposta memorandu entendimentu ho Ministériu Defeza Portugál kona-bá  misaun kapasitasaun Portugál nian iha Repúblika Demokrátika Timor-Leste ne’ebé aprezenta husi Ministru Defeza, Donaciano do Rosário Gomes.

Komunikadu ofisiál  ne’ebé RAFA.TL asesu mensiona  memorandu entendimentu ida-ne’e ho objetivu atu hametin no aprofunda kooperasaun bilaterál iha ámbitu defeza nian, liuhosi konsolidasaun no expansaun asesória temporária ne’ebé prevee ona iha programa-kuadru kooperasaun iha área defeza hodi promove atividade formasaun, ensinu, treinu no dezenvolvimentu sira ne’ebé kontribui hodi hasa’e kapasidade operasionál Defeza Nasionál no FALINTIL- Forsa Defeza Timor-Leste (F-FDTL) nian.

Memorandu ne’e mós estabelese kuadru kooperasaun ida ba dezenvolvimentu kapasidade F-FDTL,  iha área estratéjika liuliu iha Ensinu Superiór Militár, Saúde Militár, Komandu no Kontrolu, koñesimentu kona-bá situasaun militár, no mós utilizasaun Komponente Naval, Terrestre no Aéreu, nune’e mós ba reforsu kapasidade iha área materiál, ekipamentu no infraestrutura, tuir prioridade sira ne’ebé define ona husi parte rua.

Instrumentu ne’e prevee mós implementasaun ba inisiativa sira seluk ba kapasitasaun ne’ebé sei hetan akordu entre Estadu rua ne’e, tuir objetivu komún kona-ba modernizasaun no dezenvolvimentu institusionál setór Defeza nian.

Jornalista : Zita Menezes