Tribunál Aplika Medida Prizaun Preventiva Ba Arguidu Na’in-11 Iha Rede Scam Call Centre Hera

Arguidu sira rede scam call centre iha Hera Mota Ki'ik.

Díli, 24 Jullu  2026 (RAFA.TL)- Tribunál Judisiál Primeira Instánsia Díli (TJPID), Tersa-ne’e, liu husi despaisu ikus prosesu julgamentu primeiru interogátoriu deside aplika medida Prizaun Preventiva ba arguido na´in-11 ne´ebé envolve direoita Kazu Scam Call Centre iha Hera-Mota Ki´ik.

Iha audensia primieru interogatóriu ne’e, Ministériu Públiku (MP), promove arguidu na’in-11 ho krime   haat mak hanesan Krime Jogu ilísitu, Asosiasaun Kriminoza, Burla informatika no krime Brankamentu kapitais, tanba deskonfia envolve iha jogu online Scam Call Centre.

Iha alegasaun Ministériu Públiku ne’ebé reprezenta husi Prokuradór  Pedro Batista no Rafael Gusmão, solisita ba Tribunál atu aplika medida kausaun ho osan US$ 5,000.00 no Prebuisaun Aujénsia.

Hafoin  rona tiha parte sira ne’e hotu, Tribunál liu husi Juiza Ana Paula Fonseca, deside aplika Medida Prizaun Preventiva ba arguidu na’in-11.

Defeza arguidu sira nian, advogadu João Serra la konkorda ho despaisu Tribunál nian no nia parte sei halo rekursu ba iha Tribunal Rekursu iha loron 15 nia laran tamba konsidera desijaun ne´ebé iha hanesan desizaun Politika.

“Desijaun ne’e ami respeita, maibé ami konsidera desijaun  ne’e politika uitoan, maibé tenke hasai desijaun juridika, fundamenta ho juridika nian. Ami lakonkorda no sei halo rekursu ba desijaun ne’e,” Defeza João Sera ba jornalista sira iha TJPID, Sesta-ne´e.

Diresaun Servisu Investigasaun Kriminál (DSIK) Polísia Nasionál Timor-Leste (PNTL) asegura no detein  arguidu sira iha área Hera, Mota Kiik, Aldeia Halidolar, Suku Hera, Postu Administrativu Kristu Rei,  Kuarta, foin lalais ne’e.

Prosesu primeiru interogatoriu ne’e prezide husi  juiz Ana Paula Fonseca, Ministériu Públiku reprezenta husi Prokuradór Pedro Batista no Rafael Gusmão, arguidu na’in-11 hetan asistensia legal husi Advogadu Privadu,  João Serra.

Jornalista: João Carlos/Editór: Vito Salvadór