Kazu Scam Call Centre iha Kuluhun, Tribunál Aplika Kausaun US$5,000.00 Ba Jerente no Na’in-18 Kada Ema US$4,000.00

Arguidu sira kazu scam call centre Kuluhun, Díli.

Díli, 22 Jullu  2026 (RAFA.TL)- Tribunál Judisiál Primeira Instánsia Díli (TJPID), Kuarta-ne’e, liu husi despaisu ikus iha prosesu primeiru interogátoriu deside aplika medida aprezentasaun periódika, Proibisaun Auzensia, médida Kausaun US$5,000.00 ba jerente no US$4,000.00  ba kada arguidu hamutuk na’in-18 no medida Termu Identifikasaun Rezidénsia (TIR).

Tribunál mós fo prazu loron 10 ba arguidu sira hodi depozita kausaun ne’ebé iha ba Tribunál no bainhira  la depozita tuir prazu, Tribunál sei halo alterasaun husi medida kausaun ba fali iha medida Prizaun Preventiva.

Ministériu Públiku ne’ebé reprezenta husi Prokurador Rafael Gusmão halo promosaun ba arguidu na’in-19 ho krime haat (4) mak hanesan Krime Jogu ilisitu previstu iha artigu 322, Asosiasaun Kriminoza previstu iha artigu 188, Burla informatika previstu iha artigu 268no krime Brankamentu kapitais previstu iha artigu 313 husi Kodigu Penal Timor Leste nian.

Iha alegasaun Prokuradór Rafael Jeronimo Gusmão solisita ba Tribunál atu aplika medida koasaun aprezentasaun periódika, medida proibisaun auzensia no medida Kausaun ba arguidu ida ne’ebé hanesan jerente ho kausaun US$5,000.00 no mós ba arguido na’in -18 kada ema ida tenke selu US$4,000.00.

Defeza husu Tribunál atu aplika medida koasaun Aprezentasaun Periódika, medida Proibisaun Auzensia no medida Kausaun ho osan menus husi US$5,000.00 ba arguidu ida hanesan jerente, no arguidu sira seluk ho US$4,000.00  bazeia ba sira nia kondisaun ekonomika, tanba sira ne’e traballadór.

Hafoin rona tiha alegasaun husi Ministériu Públiku, Tribunál deside ba arguidu na’in-ida ne´ebé nudar jerente, aplika medida kausaun US$5,000.00 no medida aprezentasaun periódika semana ida dala rua no kontinua mantein ho medida Termu Indentidade Rezidensia (TIR).

Enkuantu ba arguidu na’in-18 aplika medida kausaun kada arguidu US$4,000.00, Medida Proibisaun Auzensia no kontinua mantein ho medida Termu Indentidade Rezidensia (TIR).

Polísia Sientifiku Investigasaun Kriminal (PCIC) ho Servisu Nasional Intelijensia (SNI) kaptura arguidu na’in-19, inklui prende ho objeitu krime sira hanesan kareta rua, no fasiliade eletronika Starlink unidade hitu no telemovel.

Jornalista: João Carlos/Editór: Vito Salvadór