Kazu Scam Call Centre iha Ulmera, Tribunál Aplika Medida Haat no Arguidu Ida Hetan Kausaun 10,000 USD

Julgamentu primeira interogatóriu ba arguidu sira ba kazu scam call centre iha área Ulmera, Liquiça.

Díli, 16 Jullu 2026 (RAFA.TL)- Tribunál Judisiál Primeira Instánsia Díli (TJPID), Kinta-ne’e, liu husi despaisu ikus prosesu primeiru interogátoriu deside aplika medida aprezentasaun periodika, proibisaun auzénsia, médida kausaun ba arguidu na’in-75 ho valor 2500.00 USD no ba Arguidu na’in-ida seluk hetan Kausaun 10.000 USD no kontinua ho medida Termu Identifikasaun Rezidénsia (TIR) ne’ebé iha.

Tribunál mós fó prazu loron 10 ba arguidu sira hodi depozita kausaun ne’ebé iha ba Tribunál, se la depozita Tribunál sei halo alterasaun husi medida kausaun ba fali iha medida Prizaun Preventiva.

Iha audénsia julgamentu primeiru interogatóriu ne’e, Ministériu Públiku (MP) halo promosaun ba arguidu na’in-76 ho krime haat (4) mak hanesan Krime Jogu ilisitu, Asosiasaun Kriminoza, Burla informatika no krime Brankamentu kapitais, tanba deskonfia envolve iha jogu online Scam Call Centre.

Antes ne’e, iha alegasaun Prokuradór, Domingos Gouveia ne’ebé reprezenta Ministériu Públiku solisita ba Tribunál atu aplika medida koasaun Aprezentasaun Periodika, medida Proibisaun Auzénsia no medida Kausaun ho osan 10,000.00 USD ba arguiduida  nu’udar manager ba Jogu Online Scam Call Centre, no arguidu na’in-75 Ministériu Públiku husu Tribunál atu aplika medida prestasaun Kausaun ho osan  5000.00 USD.

Enkuantu parte Defeza husu Tribunál atu aplika medida koasaun Aprezentasaun Periodika, medida Proibisaun Auzensia no medida Kausaun ho osan menus husi  5000.00 USD bazeia ba sira nia kondisaun ekonomika, tanba sira ne’e foin to’o mai Timor.

Polísia Nasionál Timor-Leste (PNTL) liu husi Diresaun Servisu Investigasaun Kriminal (DSIK) hamutuk ho Diresaun Servisu Informasaun Polísia (DSIP) detein sidadaun estranjeiru hamutuk na’in-76 ho flagrante delitu iha área Ulmera, Munisípiu Liquiça no halo apreensaun mós ba sira-nia pasaporte hamutuk 76, telemovel no osan balun.

Prosesu Primeiru Interogatoriu ne’e prezide husi Juiz turnu, José Maria, Ministeriu Publiku reprezenta husi Prokuradór Domingos Gouveia, arguidu na’in-76 hetan asistensia legal husi Defensor Publiku, Henrique Mariz no Advogadu Privadu, Eusebio Xavier.

Jornalista : João Carlos /Editór: Vito Salvadór