Tribunál Aplika Medida Haat Ba Arguidu Na’in-14 Ne’ebé Envolve iha Scam Call Centre iha Comoro

Arguidu sira ba kazu scam call centre ne'ebé autoridade sira halo detensaun iha área Kampu Baru, Comoro, Díli, foin lalais ne'e.

Díli, 16 Jullu 2026 (RAFA.TL)- Tribunál Judisiál Primeira Instánsia Díli (TJPID), Kinta-ne’e, liu husi despaisu ikus prosesu primeiru interogátoriu deside aplika medida aprezentasaun periódika, medida proibisaun auzénsia, medida kausaun ba kada arguidu $2500.00 no mantein ho medida Termu Indentidada Rezidensia (TIR) ne’ebé antes ne’e iha ona.

Iha julgamentu interogasuan dahuluk iha TJPID ne’e, Ministériu Públiku (MP) halo promosaun ba arguidu na’in-14, ho krime haat (4) mak hanesan Krime Jogu ilisitu, Asosiasaun Kriminoza, Burla informatika no krime Brankamentu kapitál, tanba deskonfia envolve iha jogu online Scamming Call Centre.

Antes ne’e, iha alegasaun Prokuradór João Marques, ne’ebé reprezenta Ministériu Públiku husu Tribunál atu aplika medida proibisaun auzensia, medida aprezentasaun periodika ba arguidu  na’in-rua no medida Kausaun ho osan $3000 ba kada arguidu sira ne’ebé envolve iha jogu ilísitu ne’e.

Enkuantu husi parte defeza la aseita ho alegasaun MP nian ne’ebé mak husu Tribunál atu aplika Kauasaun kada arguidu $3000, tanba medida kausaun ne’e valor boot liu, nune’e husu Tribunál tenke reduz medida kausaun, tanba haree ba arguidu sira nia kondisaun ekonomia.

Tribunál mós fó prazu loron 20 ba iha arguidu sira, atu selu kausaun ne’e, se arguidu sira la selu maka Tribunál sei halo fali alterasaun husi medida kausaun, ba iha medida Prizaun Preventiva.

Arguidu na’in-14 ne’e, autoridade Polísia detein iha Kampung Baru, Comoro, durante operasaun iha kapital Dili. Ekipa mós prende sira-nia pasaporte hamutuk  14, telemovel no osan balun.

Prosesu Primeiru Interogatóriu ne’e prezide husi Juiz estajiadu Marculino dos Santos Oliveira, Ministériu Públiku reprezenta husi Prourador João Marquez, arguidu na’in-14 hetan  asistensia legal husi Advogadu Privadu, Octavio Cardozo.

Jornalista : João Carlos/Editór: Vito Salvadór