Kazu Scam Call Centre Manleuana, Tribunál Aplika Medida Haat no Kausaun $2,500.00 Ba kada Arguidu Na’in-29

Arguidu sira ba kazu scam call centre.

Díli, 12 Jullu 2026 (RAFA.TL ) – Tribunál Judisiál Primeira Instánsia Díli (TJPID), liu husi despaisu ikus ba prosesu primeiru interogatóriu, deside aplika medida haat ba arguidu na’in-29 no kausaun $2,500.00 ba kada arguidu.

Medida kausaun mak ezijénsia legál ne’ebé Tribunál aplika ba arguidu ida atu garante katak nia sei kolabora nafatin durante investigasaun, la halai ses, no labele halo tan krime. Iha Timor-Leste, kausaun konsiste iha entrega osan, bens, ka garante fiar hodi evita prizaun preventiva.

Iha despaisu ne’e, Juiz José Gonçalves deside aplika medida haat ba iha arguidu na’in-29,  maka hanesan, medida aprezentasaun periódika, proibisaun de auzénsia, Termu Identidade Rezidénsia (TIR)  no  kausaun ba kada arguidu ho montante $2,500.00 .

Iha despaisu ne’e, Tribunal fó prazu semana ida ba arguidu na’in-29, atu selu kausaun ne’ebe Tribunál hasai liu husi despaisu Tribunál nian.

Antes ne’e,  Ministériu Públiku (MP) iha alegasaun ba kazu jogu online scamming call centre no jogu online game iha Manleuana husu Tribunál atu aplika medida haat ba arguidu hamutuk na’in-29.

Advogadu privadu, Armindo Sanches hatete Tribunál fó prazu semana ida arguidu sira atu kumpri medida kausaun  tenke selu ho osan $2,500.00 .

“Ministériu Públiku husu kausaun $5000.00  maibé ami konfirma fali arguidu sira, so bele selu $2,500.00 to’o $3,000.00. Maibe, Tribunál aseita $2,500.00.  Medida Aprezentasaun Periódika, arguidu sira aprezenta an ba Polísia Eskuadra ne’ebé besik kada-fulan  dala rua,” Armindo Sanches  informa ba Jornalista sira iha Tribunál Judisiál Primeira Instánsia Díli (TJPID), Domingu-ne’e.

Iha alegasaun ne’e Prokuradór  Domingos Goveia ne’ebé reprezenta Ministériu Públiku solisita ba iha Tribunál atu aplika medida Prizaun Preventiva no Kausaun, no ikus mai Tribunál deside aplika deit medida kausaun ba kada arguidu na’in-29 tenke selu $2,500.00.

Arguidu na’in-29 ne’e, Ministériu Públiku (MP) promove ho krime Burla Informatika, Asosiasaun Kriminoza, no jogu ilisitu.

Jornalista: João Carlos/Editór: Vito Salvadór