PN Aprová Rejime Juridikú Pratika Arte-Marsiál, FRETILIN-PLP Abstensaun

Atividade grupu arte-marsiál Persaudaraan Setia Hati Terate (PSHT). Imajen/dok.espesiál

Díli, 06 Jullu 2026 (RAFA.TL)- Parlamentu Nasionál (PN),  Segunda (06/07/2026) aprova iha finál global  lei nú.24/VI (3a) rejimé juridikú pratika arte-marsiál ho votu á-favor 39 kontra zero no bankada  Bankada FRETILIN ho PLP fó votu abstensaun hamutuk 20.

“Rezultadu votasaun finál global ba lei rejimé juridikú pratika arte-marsiál á-favor 39, kontra zero abstensaun 20, ne’ebé votasaun finál global pasa,” deklara Prezidente Parlamentu Nasionál (PPN), Maria Fernanda Lay iha plenária.

Iha fatin hanesan Xefe Bankada KHUNTO,  Deputadu António Vedial de Sousa, subliña bainhira Parlamentu Nasionál aprová lei foun ida-ne’e klaru, kona-bá rejime juridikú pratika arte-marsiál no mensajen prinsipál ne’ebé oferese ba Governu mak atu regula atu garante seguransa públika no transforma arte-marsiál sai nu’udár dezenvolvimentu desportu ne’ebé tenke foka ba étika.

“Pontu prinsipál ne’ebé Parlamentu Nasionál oferese ba Governu mak hanesan, ida mensajen atu regula la’ós atu halakon, rua Governu tenke organiza no kria fali regra foun ba klubu no sentru sira hotu, tolu garante seguransa no valor étika, iha buat rua ne’ebé importante, ida prevene krimé, rua foka ba desportu, tolu inkompatibilidade ba membru estadu nian no mantein imparsialidade,”  Deputadu Deputadu Antonio Vedial de Sousa afirma.

Ministru Interiór Francisco da Costa Guterres hatete, Governu agradese ba Parlamentu Nasionál ba komisaun sira ne’ebé halo diskusaun di’ak tebes hodi konsegé votasaun final global ba lei nú 24/VI(3a),  rejimé juridikú pratika arte marsiais.

“Atu klarifika de’it katak rezolusaun Governu la’ós atu taka, maibé atu suspende hodi hein para lei ida-ne’e tama iha vigór automatikamente rezolusaun Governu ne’e la vale ona tama  seim efeitu ona. Tanba ne’e, ita aprová ida-ne’e ami komesa servisu fó ami fulan-neen atu servisu depois kuandu tama iha vigór ona rezolusaun Governu la vale ona,” Ministru Francisco da Costa Guterres esklarese.

Ministru Interiór ne’e subliña Governu sei halo servisu hotu iha prazu fulan-neen hodi haré ba oin oinsá mak kontinua regulariza pratika sira arte-marsiál nian iha Timor-Leste tuir lei sira ne’ebé vigora hodi grante paz no estabilidade iha sosiedade.

Jornalista : Zita Menezes/Editór: Vito Salvadór