Kazu Scam Call Centre, Tribunál Aplika Medida Koasaun Prizaun Preventiva Ba Jerente no Arguidu Na’in-60 Aprezentasaun Periódika

Arguidu sira ba kazu atividade ilísitu iha Tibar aprezenta iha julgamentu primeira interogatóriu iha TJPID.

Díli, 01 Jullu 2026 (RAFA.TL)- Tribunál Judisiál Primera Instansia Díli (TJPID), liu husi julgamentu Primeiru Interogatóriu ba atividade ilísitu Scamming Call Centre , deside  hodi aplika medida Prizaun Preventiva ba jerente ida no arguidu na´in-60 seluk hetan medida Aprezentasaun Periódika (AP) no selu kausaun monetaria ho osan $ 2.500 ba kada ema.

Iha loron 26 fulan-Juñu tinan 2026, Polísia Nasionál Timor-Leste halo operasaun  no detesaun ba arguido na’in-61 ho nasionalidade  Indonézia iha área Tibar, Postu Administrativu Bazartete, Munisípiu Liquiça, tanba deskonfia hala’o atividade ilísitu scam call centre no jogu online.

Iha despaisu Tribunál nian, Kuarta (01/07/2026),  Juiza turnu Ersilia de Jesus deside aplika medida Prizaun Preventiva ba arguidu ida nu’udár jerente ka jestór ba atividade ílisitu  ne’e no arguidu sira seluk, na’in-60, Tribunál aplika medida aprezentasaun Periódika no medida  kauzaun ho osan $2500 ba kada ema.

Ba medida Aprezentasaun Periódika, arguidu na’in-60 sei aprezenta an iha Eskuadra Polísia ne’ebé hela besik kada semana no Tribunál mós fó prazu loron 10 ba iha arguidu na’in-60, atu selu kausaun ne’ebé Tribunál aplika.

Hafoin despaisu tun, Tribunál mós esplika ba iha arguidu sira katak bainhira la konkorda ho despaisu Tribunál nian, bele liu husi sira nia defeza halo rekursu ba iha Tribunál Rekursu tuir prazu durante loron 30.

Prokuradór Matias Soares ne’ebé reprezenta Ministériu Públiku, iha nia alegasaun husu Tribunál atu aplika medida Prizaun Preventiva (PP) ba arguidu ida nu’udar jerente. Maibé parte defeza

husu atu  Tribunál aplika medida Aprezentasaun Periódika no kausaun ho montante $10,000.00 ba jestór.

Prosesu ba Arguidu na’in-61 ne’e submete ba iha Tribunál, ho prosesu Nuc, 0227/26.PNSIK no Ministeriu Publiku (MP), liu husi Prokuradór Matias Soares, ne’ebé promove arguidu sira ho krime haat, Asosiasaun Kriminosa ne’ebé previstu iha artigu 188 husi Kodigu Penal, krime Explorasaun Ilísitu Jogu ne´ebé previstu iha artigu 322 husi Kodigu Penal, krime Brankamentus Kapitais ne´ebé previstu iha artigu 313 husi Kodigu Penal, no krime Fraude Fiskal ne´ebé previstu iha artigu 314 husi Kodigu Penal.

Prosesu primeiru interogatoriu ne’e, prezide husi Juiza Ersila de Jesus, Ministeriu Publiku reprezenta husi Prokuradór Matias Soares, arguidu na’in-61 hetan asisténsia legal husi Advogadu Privadu, Benigno Guterres Gusmão ho Octavio Cardozu.

Jornalista: João Carlos/Editór: Vito Salvadór