PNTL Sei Halo Investigasaun Klean Ba Kazu Ajente Prinsipál Polísia Engrasia Purificação Tiru An

Díli, 25 Juñu 2026 (RAFA.TL)- Porta-vós Komandu Jerál Polísia Nasionál Timor-Leste (PNTL), Superintendente Xefe Polísia João Belo dos Reis, informa Komandu Jerál PNTL sei halo investigasaun klean ba kazu Ajente Prinsipal Polísia Engrasia Purificação ne’ebé tiru an iha Matadoru, Díli.

Hafoin akontesimentu tiru an ne’e, autoridade seguransa no família sira evakua kedas vítima ba iha Ospital Nasionál Guido Valadares (HNGV) maibé la bele salva tanba kauza vitíma nia ulun rahun no ran sai barak.

“Kuarta-kalan, 24 Juñu ne’e, sentru Opersaun Polísia Nasionál Timor-Leste simu informasaun katak iha akontesementu tiru an iha área Matadoru, nune’e ekipa Operasaun hakat kedas ba fatin ne’ebá, depois halo koordenasaun lori kedas vítima ba Ospitál. Ekipa médiku sira halo esforsu hotu-hotu tenta atu salva nia vida, infelismente labele salva tanba kilat musan kona nia ulun grave, ran sai barak, labele salva,” Superintendente Xefe Polísia João Belo dos Reis informa ba jornalista sira iha Komandu Jerál PNTL, Díli, Kinta (25/06/2026).

Superintendente Xefe Polísia ne’e informa agora dadauk Polísia Forensik ho ekipa servisu Investigasaun Kriminál hein hela rejultadu autopsia ba vítima, bainhira finaliza ona autopsia nune’e  bele aprejenta ba Ministeriu Públiku atu halo prosesu.  Tanba ne’e, Polísia husu ba família atu nafatin koopera ho ekipa  Polísia investigasaun para bele hetan nia motivu ba kazu tiru an ne’e.

“Kona-bá evidénsia Pistola ho embolku asegura ona husi Polísia Forensik, nune’e ekipa investigasaun kontinua rekolla informasaun hodi sai prova atu  aprezenta ba Ministériu Públiku,” João Belo dos Reis  hateten.

Lori Komandu PNTL nia naran fó sentidu kondelensia ba oan kiak, família ho belun servisu sira, sente triste  lakon ajente prinsipál Polísia ida ne’ebé durante ne’e didika nia an tomak ho profisionál Polísia nian.

Ajente Prinsipál Polísia ne’e hala’o knaar nu’udar Kompañia Seguransa Pesoál (CSP) iha Unidade Espesiál Polísia (UEP), no durante ne’e fó seguransa (eskolta) ba membru Governu balun.

Jornalista : João Carlos/Editór: Vito Salvadór