Membru PN Husu Autoridade Sira Trata Kazu Ne’ebé Rezulta Nadine Lakon Vida ho Seriedade

Polísia aprezenta suspeitu na'in-rua kona-bá kazu naok karteira ho telemovel ne'ebé rezulta Nadine lakon vida no nia bin kanek todan.

Díli, 09 Juñu 2026 (RAFA.TL)– Membru Parlamentu Nasionál husi Bankada KHUNTO António Verdial de Sousa ho membru Bankada CNRT, Natalino dos Santos,  husu entidade kompetente sira, hanesan Polísia Nasionál Timor-Leste (PNTL), Polísia Sientifikú Investigasaun Kriminál (PCIC) no autoridade judisiál sira tenke trata kazu asidente ne’ebé akontese iha área Praia dos Coqueiros, Díli, ho seriedade tanba hamosu vitíma to’o rezulta ema lakon vida.

Notísia Relevante: Suspeitu Na’in-Rua Ba Kazu Hadau Karteira iha Praia Coqueiros Sempre Halo Asaun Naok iha Díli Laran

Membru Bankada KHUNTO, António Verdial de Sousa hateten, relasiona ho kazu asidente ne’ebé akontese Praia dos Coqueiros iha Domingu kalan,  07 Juñu ne’e,  kauza husi aktu krime ne’ebé komete husi minoridade inisial nain-rua hodi  hadau vitíma nia karteira ho telemovél tanba falta edukasaun no falta kontrola husi inan-aman.

“Kualidade hanesan Deputadu ha’u reprezenta povu, husu inan-aman sira bainhira haruka oan sira mai Díli eduka kedan, atu nune’e, labele hatudu atitude hanesan agora daudaun akontese,” Deputadu António Verdial de Sousa  informa ba jornalista sira iha Parlamentu Nasionál, Tersa (09/06/2026).

Reprezentate povu ne’e afirma oinsá mak atu rezolve problema ne’e mak fila-fali ba PNTL, Estadu, Governu ho autór judisiál sira, oinsá atu trata asuntu ne’e ho seriédade banati nafatin ba regra ne’ebé vigora.

“Labele ba kaer tiha depois mai, dehan katak nia tinan seidauk to’o ne’ebé nia tenke fila-fali ba uma. Ne’e laiha razaun, implementadór sira tenke hatene, kuandu hatudu o nia atitude ruma hodi rezulta ema mate, favór boot ida atu halo nusá maibé sé karik lei liha favor boot ida husu ukun na’in sira atu uza sira nia autoridade hodi halo dezisaun ,” Deputadu António Verdial hateten.

Tuir  observasaun Deputadu ne’e nian katak kazu sira hanesan ne’e akontese bei-beik tanba falta edukasaun, edukasaun la’ós mai husi manorin sira de’it, maibé edukasaun ne’e tenke mai husi inan-aman sira.

Membru   Bankada CNRT Natalino dos Santos hateten, bainhira kaer ona autór sira, lori ba Ministériu Públiku kondena no lori autór krimé ba julgamentu hodi bele responzabiliza sira nia aktu krimé, tanba iha  Estadu direitu demokratiká hotu-hotu iha lei nia okos.

Tuir nia,  fenomena ida ne’e tenke haré oinsá bele tau atensaun ba problema sira ne’e, seraké buat sira ne’e mosu tanba iha motivu ruma ka keta iha krimé organizadu ruma.

“Servisu polísia no intelejénsia nian, liu-liu PCIC) atu halo análize ba situasaun sira hanesan ne’e. Agora hanesan ema politikú, hanesan Deputadu lamenta tebes ba situsaun ne’e, ita haré katak krimé sira ne’e akontese ne’e maioria krime ne’e labarik sira minoridade mak halo ida-ne’e mak triste tebes,” tenik Deputadu Natalino dos Santos.

Nia afirma  tuir lei labarik sira idade minoridade ba to’o iha tribunál tenke absolve, tanba lei hatete katak labarik sira minoridade nia  halo krime la responsabiliza nia aktu ne’e iha perante justisa nia oin.

Kazu ho natureza hanesan akontese dala ida ona iha área Praia dos Coqueiros iha kalan 22 fulan-Maiu tinan 2025, hale’u tuku 19:50 Otl.

Kronolójia akontesimentu momentu ne’ebá, sidadaun feto ida ho nia oan Nituchia Fangidae ho motorizada liuhosi área Kampung Alor, hakfodak mai, mosu suspeitu na’in-haat ho motór duni tuir hela sidadaun feto ne’e ho nia oan ho  objetivu atu hadau sira-nia telefone ne’ebé sikat hela iha motór inia bolsu oin.

Suspeitu sira konsege hadau sidadaun feto ne’e ninia telefone, nune’e sidadaun feto ne’e duni tuir kedan suspeitu na’in-haat no bainhira to’o iha Loja Sehara nian oin, área Praia dos Coqueiros, vítima  tenta hadau hikas nia telefone. Maibé, la konsege tanba  iha suspeitu ida mak ho nia motór halai hosi vítima sira nia kotuk, lori ai fai bá vítima nia motór, ikus mai vítima ho ho nia oan feto Nituchia Fangidae ho motór  monu ba alkatraun rezulta sira-na’in rua kanek grave no ikus mai Nituchia Fangidae, tinan hitu (7) lakon vida.

Jornalista : Zita Menezes/Editór: Vito Salvadór