Segunda Divizaun LFTL, AC Mamura Fahe Pontu Hanesan ho Weasel F.C ho Score 1-1

AC Mamura fahe pontu hanesan Weasel F.C ho Score 1-1 iha jogu Liga Futeból Timor-Leste (LFTL), Segunda Divizaun grupu A iha Estádiu Munisipál Díli, Domingu (31.05/2026). Imajen/LFTL

Díli, 01 Juñu 2026 (RAFA.TL)- Jogu kontinuasaun Liga Futeból Timor-Leste (LFTL), Segunda Divizaun grupu A,  ekipa estimadu komunidade Mamura, Suku Bairru-Pité, AC Mamura obrigadu tenke fahe pontu hanesan ho nia adversáriu Weasel F.C hafoin  iha minutu 90 ekipa rua empata ho score 1-1.

Iha jogu kontinuasaun ne’ebé halao iha estádiu Munisipál Díli, Domingu (31/05/2026), ekipa AC Mamura halo kedas presaun ba ekipa Weasel F.C desde minutu dahuluk. Ekipa AC Mamura  ho jogu ne’ebé lais no iha kombinasaun di’ak iha liña klaran halo ekipa ne’e forte tebes hodi lansa  atake barak  ba Weasel F.C.

Maske nune’e ekipa Weasel F.C la joga iha presaun nia laran, no ekipa estimadu komunidade Ermera ne’e mantein ho sira nia ritmu jogu ne’ebé iha no joga ho livre hodi buka mós oportunidade domina jogu liu husi kontra atake atu bele marka golu.

Tama ba minutu 30 ekipa AC Mamura konsenge marka uluk golu ida hodi muda score ba 1-0 liu husi jogadór Wolter Clau.

Ho golu ne’e halo ekipa Weasel F.C  hadi’a liña klaran no hahú halo jogu ida ho presaun maka’ás atu buka empata.

To’o primeira parte termina, ekipa AC Mamura kontinua lidera ho score 1-0 no ekipa Weasel F.C mantein ho score zero.

Kontinua ba segunda parte, Weasel F.C halo esforsu maka’ás hodi buka  marka golu ba nia adversáriu AC Mamura, maibé oportunidade sira ne’ebé iha seidauk nakfilak ba golu nune’e AC Mamura kontinua lidera jogu ne’e.

Ekipa rua mantein ho ritmu jogu ne’ebé iha no Weasel F.C to’o halo tranzisaun ba jogadór sira no halo balansu no domina jogu, ho nune’e, tama ba minutu 58 Jogadór Weasel F.C Romario Florindo marka golu ida hodi muda score ba 1-1 hafoin halo sutu maka’ás husi dok.

Ekipa rua halo mós subtituisaun ba liña jogadór hodi hadi’a jogu no hasa’e intensidade jogu iha kampu laran, maibé ekipa rua sei iha forsa hanesan no score iha tabela la muda to’o jogu termina.

Ho rezultadu ne’e, ekipa AC Mamura provizoriamente rekolla pontu haat husi jogu rua iha grupu A no ekipa Weasel F.C rekolla pontu importante iha sira nia jornada ba Liga Timorense époka 2026.

Tuir orariu jogu Liga Timorense iha Segunda Divizaun, Tersa (02/062026), grupu A, ekipa AD Santu António hasoru As Ponta Leste no grupu B  Weasel F.C  kontra Hibers Díli F.C iha estádiu Munisipál Díli.

Jornalista: Marito da Costa/Editór: Vito Salvadór